İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 326 Hüküm no: 312 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Yunus’un kocası Mehmed b. Şehade ile birbirlerinin zimmetlerini ibra ettikleri İbrâ. Mahmiye-i İstanbul’da Üskübi mahallesinde sâkine Âişe bt. el-Hâc Yunus nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb zevci el-Hâc Mehmed b. el-Hâc Şehade? mahzarında ikrâr ve takrîr-i kelâm edip zevcim mezbûr el-Hâc Mehmed zimmetinde mütekarrir ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem ve me’ûnet-i süknâm dahi kendi üzerime olmak [üzere] zevcim el-Hâc Mehmed ile muhâla‘a-i sahîha’-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika âmme-i de‘âvîden her birimiz âharın zimmetini ibrâ-i âmm-ı kātı‘u’’n-nizâ‘ ile ibrâ ve ıskāt eyledik deyü gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa Efendi el-kādî, Mehmed Efendi Kastamonî, Mustafa Efendi b. Muharrem, Mehmed Efendi b. Ahmed, el-Hâc Salih b. Ali, el-Hâc Mehmed b. Ahmed, el-Hâc Ahmed b. …?, el-Hâc Yusuf b. el-Hâc Amiri?