İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 352 Hüküm no: 348 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Mehmed’in muhterik menzil arsasını Mustafa Beşe b. Hasan’a sattığı Mülknâme. Dergâh-ı âlî yeniçerilerinin birinci kethudâ bey odası ahâlîsinden Hasan Beşe b. Mehmed nâm râcil meclis-i şer‘de oda-i merkūme ahâlîsinden fahrü’l-akrân bâ‘isü hâze’l-kitâb Mustafa Beşe b. Hasan nâm râcil tarafından husûs-ı âti’l-beyânı tasdîke sâbitü’l-vekâle vekîli olan yine oda-i mezbûre ahâlîsinden fahrü’l-a‘yân Ahmed Beşe b. Mehmed nâm râcil mahzarında ikrâr ve takrîr-i kelâm edip mahmiye-i İstanbul’da Hızırbey mahallesinde vâki‘ iki tarafı Mehmed Kethudâ Vakfı’ndan olup benim tasarrufumda olan menzile ve bir tarafı Hızır Çelebi Vakfı’na ve bir tarafı tarîk-i âmma müntehî muhterik mülk menzil arsasını üzerinde mevcûd olan nıkzı ile bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık yirmi iki bin nakd-i râyic fi’l-vakt akçeye müvekkil-i merkūm Mustafa Beşe’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ u teslîm ol dahi ber-minvâl-i muharrer iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi iki bin akçeyi müvekkil-i mersûm Mustafa Beşe yedinden tamamen ahz u kabz eyledim ba‘de’l-yevm zikrolunan muterik menzil arsası müvekkil-i merkūm Mustafa Beşe’nin mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-âşir min-Ramazani’l-mübârek li-sene isnâ ve seb‘în ve elf. Şuhûdü’l-hâl: Ahmed Çelebi b. Mahmud, Hüseyin Beşe el-masdârî, Kadri Beşe vekîl-i harc, Ramazan Beşe el-mu‘temed, Şahin Beşe b. Abdullah, Mustafa Beşe b. Mehmed, Mehmed Beşe b. Abdullah, Osman Beşe b. Mustafa.