İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 370 Hüküm no: 372 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamizâde Mehmed Efendi’nin menzilini İbrahim Ağa’ya hibe ettiği Hîbe-i menzil-i Şâmizâde Efendi. Atebe-i aliyye lâ-zâlet meşhûnetü bi’l-inâyâti’s-sübhâniyede hâlâ reisülküttâb olan iftihârü a‘rifü zevi’l-avârif usvetü ashâbi’l-kemâlât ve’l-me‘ârif sahibü’s-sa‘âdeti ve’l-iclâl sahibü ezyâli’l-hamîd ve’l-ikbâl zü’l-kadri’r-refî‘i ve’l-câhi’l-menî‘ câmi‘ü’l-mekârim ve’l-meâli merci‘u’l-ekâbir ve’l-e‘âlî el-mahfûf bi-sunûf-i avâtıfi’l-meliki’l-hamd Şâmizâde el-Hâc Mehmed Efendi’nin mahmiye-i İstanbul’da Şehsüvar mahallesinde vâki‘ menzil-i âlîlerinde ma‘kūd meclis-i şer‘-i şerîf-i enverde müşârün-ileyh el-Hâc Mehmed Efendi kethudâsı mefharu’l-emâsil ve’l-akrân makbûlü’s-sudûr ve’l-erkân işbu kitâbın sahibi İbrahim Ağa el-merhûm Mehmed Efendi mahzarında ikrâr ve takrîr-i kelâm edip mahmiye-i mezbûrede Bostancıbaşı Ali Ağa mahallesinde vâki‘ etrâf-ı selâsesi tarîk-i âm ve taraf-ı râbi‘i ba‘zan tarîk-i hâs ve ba‘zan Kasab Mustafa Çelebi mülkü ve ba‘zan Yaycı İsmail Çelebi mülkü ve ba‘zan İmâm İbrahim Efendi mülkü ile mahdûd olup tarîk-i hâs ve ona muttasıl olan tarîk-i âm tarafından merhûm Hayreddin Paşa Vakfı’ndan senede bin altı yüz seksen akçe mukāta‘alı bi-hisâb-ı terbî‘i beş yüz yirmi zirâ‘ arsa ve bahçe tarafında Medîne-i Münevvere Vakfı’ndan mukāta‘alı iki yüz otuz iki buçuk zirâ‘ hâlî ani’l-binâ arsayı muhtevî ve mâ‘adâ arsası mülküm olup hâriciyesi tabaka-i ulyâda dîvanhâne ve bir tarafında dîvanhâneye muttasıl bir kilârî ve bir kahve odasını ve taraf-ı âharında nîm sofalı bir kebîr odalı ve ona muttasıl üç bâb odaları ve iki sofalı bir kebîr diğer odayı ve bir küçük yan sofasını ve iki fevkānî kenîfi hâvî ve tabaka-i vüstâda altı bâb odayı ve altında bir ahuru ve matbahı hâvî ve dâhiliyesi tabaka-i ulyâda dört bâb odalı ve üç sofalı ve iki kenîfi ve tabaka-i vüstâda üç bâb oda ve bir kilârı ve tabaka-i süflâda mahzeni ve iki halvetli bir hamam ve bir halîkân? odasını ve matbah ve mahtabı bi’r-i mâyı müştemil menzilde mülk olan arsa ile merkūmeyi mezbûr İbrahim Ağa’ya hiber-i sahîha-i şer‘iye ile hîbe ve temlîk ve teslîm ol dahi meclis-i hîbede ittihâb ve temellük ve tesellüm ve kabûl edip zikrolunan vakıf arsaları dahi mütevellî ma‘rifetiyle merkūm İbrahim Ağa’ya meccânen ferâğ ve tefvîz ol dahi tefevvüz ve kabûl eyledi dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: es-Sâbıkūn.