İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 369 Hüküm no: 371 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamizâde Mehmed Efendi’nin kızı Fâtıma Hanım’ın hissesine düşen arsa ve menzili Mustafa Efendi’ye sattığı İbrâ ani’l-menzil Şâmizâde Efendi. Atebe-i aliyye-i Sultan iyye lâ-zâlet meşhûnetü bi’l-inâyâti’s-sübhâniyede hâlâ reisülküttâb olan iftihârü a‘rifü zevi’l-avârif usvetü ashâbi’l-kemâlât ve’l-ma‘ârif sahibü’s-sa‘âdeti ve’l-iclâl sahibü ezyâli’l-hamîd ve’l-ikbâl zü’l-kadri’r-refî‘i ve’l-câhi’l-menî‘ câmi‘ü mekârim ve’l-meâli merci‘u’l-ekâbir ve’l-e‘âlî el-mahfûf bi-sunûf-i avâtıfi’l-meliki’l-hamd Şâmizâde el-Hâc Mehmed Efendi’nin mahmiye-i İstanbul’da Şehsüvar mahallesinde vâki‘ menzil-i âlîlerinde ma‘kūd meclis-i şer‘-i enverde ve mahfil-i dîn-i münîf-i ezherde müşârün-ileyh el-Hâc Mehmed Efendi’nin kethudâsı mefharu’l-emâsil ve’l-akrân makbûlü’s-sudûr ve’l-erkân İbrahim Ağa el-merhûm Mehmed Efendi halîle-i celîleleri Fâtıma Hanım bt. el-müşârun-ileyh el-Hâc Mehmed Efendi tarafından ikrâr-ı âti’z-zikri tasdîke vekîl olup nehc-i şer‘î ve vech-i mer‘î üzere vekâleti sâbite olan ekmelü’l-müderrisîn efdalü’l-muhakkıkīn Mustafa Efendi mahzarında ikrâr ve i‘tirâf edip mahmiye-i mezbûrede Bostancıbaşı Ali Ağa mahallesinde vâki‘ etrâf-ı selâsesi tarîk-i âm ve taraf-ı râbi‘i ba‘zan tarîk-i hâs ve ba‘zan Kasab Mustafa Çelebi mülkü ve ba‘zan Yaycı İsmail Çelebi ve ba‘zan İmâm İbrahim Efendi mülkleri ile mahdûd olup tarîk-i hâs ve ona muttasıl olan tarîk-i âm tarafından merkūm Hayreddin Paşa Vakfı’ndan senede bin altı yüz seksen akçe mukāta‘alı bi-hisâb-ı terbî‘i beş yüz yirmi zirâ‘ arsa ve taraf-ı âharında kezâlik Yahya Paşa Vakfı’ndan senede bin iki yüz akçe mukāta‘lı bi-hisâb-ı mezbûr beş yüz kırk zirâ‘ arsa ve bahçe tarafından Medîne-i Münevvere alâ-münevverihâ efdalü’t-tahiyye vakfından mukāta‘alı iki yüz otuz iki buçuk zirâ‘ hâlî ani’l-binâ arsayı muhtevî ve mâ‘adâ arsası mülküm olup hâriciyesi tabaka-i ulyâda dîvanhâneyi ve bir tarafdan dîvanhâneye muttasıl bir kilârî ve kahve odasını ve taraf-ı âharında nîm sofalı bir kebîr odalı ve ona muttasıl üç bâb odaları ve iki sofalı bir kebîr diğer odayı ve bir küçük yan sofasını ve iki fevkānî kenîfi ve tabaka-i vüstâda altı bâb odalı ve altında bir ahuru ve matbahı hâvî ve dâhiliyesi tabaka-i ulyâda dört bâb odalı ve üç sofalı ve iki kenîfi ve tabaka-i vüstâda üç bâb oda ve bir kilârı ve tabaka-i süflâda bir mahzeni ve iki halvetli bir hamamı ve bir camekân odasını ve matbahı ve iki bi’r-i mâyı müştemil binâsı mülk-i mevhûbum olan menzilde mülk olan arsa ile ebniye-i merkūmenin nısf-ı şâyi‘ini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık müvekkile-i mûmâ-ileyhâya beş bin riyâlî guruşa bâtten bey‘ u teslîm ol dahi iştirâ ve tesellüm ve vakf olan arsaların dahi nısf-ı şâyi‘ini meccânen müvekkile-i mûmâ-ileyhâya mütevellîler izni ile ferâğ ve tefvîz ol dahi tefevvüz ve kabûl eyledikden sonra semeni olan meblağ-ı mezbûr beş bin kıt‘a riyâlî guruşdan müvekkile-i mûmâ-ileyhânın zimmetini ibrâ-i âmm-ı kātı‘u’n-nizâ‘la <> ve ıskāt eyledim ba‘de’l-yevm menzil-i mezbûrun nısf-ı şâyi‘i müvekkile-i müşârün-ileyhânın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-hâmis aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: Fahrü’l-akrân Mehmed Ağa Adana Voyvodası, Fahrü’l-cüyûş Mehmed Çavuş, Ahmed Çelebi b. Abdülvahhab, Fahrü’l-eimme Mehmed Efendi b. Mahmud, Fahrü’l-akrân Ahmed Ağa b. Ebûbekir, Fahrü’l-akrân Hızır Ağa b. Abdülmennan, el-Hâc Ahmed b. ( ), el-Hâc Sefer Ağa b. ( ), Ali Çavuş b. Nasuh, Mehmed Çelebi b. ( ), Muharrem Bey el-cündî, Zülfikar Bey b. ( ), Süleyman Çelebi b. ( ), Hüseyin Çavuş, Mustafa Bey b. Piyale, İbrahim Bey b. ( ).