İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 372 Hüküm no: 374 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa Vakfı olan ekmekçi fırını boş kaldığından alet ve edevâtıyla Agop v. Şehab ve Kasir v. Bağram isimli Ermenilere teslim edildiği Habbâzân eşyâsından teslîm. Mahmiye-i İstanbul’da hâlâ Ekmekçiler kethudâsı olan fahrü’l-a‘yân Mehmed Ağa b. el-Hâc Ali meclis-i şer‘-i hatîrde takrîr-i kelâm edip mahmiye-i mezbûrede Açık mahallesinde vâki‘ merhûm ve mebrûr Koca Mustafa Paşa’nın vakıf ekmekçi fırınında habbâz olan Bağram v. Toros ve Kabasakal Marko nâm Ermeniler firâr edip zikri mürûr eden fırın hâlî ve mu‘attal kalıp âhara îcâr olunmakla mezbûrenin mallârından zikrolunan fırında der-anbâr olunan buğday ve dakīk ve sâir eşyâsı tahmîn-i sahîh ile tahmîn ve takvîm olunmak için kıbel-i şer‘den üzerine varılmak matlûbumdur dedikde taraf-ı şer‘den Mevlânâ Ahmed Efendi b. el-Hâc İbrahim irsâl olunup ol dahi zeyl-i rakīmde ehl-i vukūf ve bî-garaz Müslimîn zikrolunan fırına varıp içinde mevcûd olan buğday keyl olundukda altmış beş keyl Varna buğdayının beher keyli otuz ikişer akçeden iki bin seksen akçe ve iki yüz otuz bir keyl Mangalya buğdayının her keyli kırk beşer akçeden bin üç yüz doksan beş akçe ve dört yüz otuz keyl Tekfurdağı buğdayının her keyli altmışar akçeden yirmi beş bin sekiz yüz akçe ve yetmiş altı keyl ıslak buğdayın her keyli kırk beşer akçeden üç bin dört yüz yirmi akçe ve yirmi üç keyl dakīkin her keyli kırk beşer akçeden bin otuz beş akçe ve yirmi re’s bargir ile otuz çeki odun ber-vech-i tahmîn yirmi beş bin akçe ve sâir âlât-ı habbâz iki bin iki yüz akçe ki cem‘an altmış dokuz bin dokuz yüz otuz akçe oldukdan sonra zikrolunan fırın içinde olan eşyâ-i mezkûre işbu bâ‘isü’s-sifr hâzırân fi’l-meclis Agop v. Şehab ve Kasir v. Bağram nâm Ermenilere teslîm olunup onlar[dahi] kabûl ve kabz etmeğin vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Fahrü’l-akrân Mehmed Ağa kethudâ-yı habbâzân, Fahrü’l-akrân Ahmed Ağa b. Abdullah, el-Hâc Mehmed Beşe b. Abdullah, Behram Çelebi b. Musa, el-Hâc Mahmud b. Nasuh el-habbâz, Mehmed b. Mahmud, Erzurumlu fırınında Kirakor Ağyar, Kadı Çeşmesi fırınında Avanos el-habbâz, Dörtyol ağzı fırınında Kiryakos v. Marat, Darbhâne fırınında Kızıl v. Hanım, Sarıgörez fırınında Ağazar v. Marat, Vâlide fırınında Haçok v. Marat, habbâz fırınında Darkar v. Abram, Meşrik v. Ağazar v. Bahtiyar.