İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 382 Hüküm no: 389 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtâre’nin kölesi Ahmed b. Yusuf’un çaldığı paranın iade edilmesi Altı yüz seksen akçeyi teslîme tenbîh. Mahmiye-i İstanbul’da Hâcce Hatun mahallesi sâkinelerinden Muhtâre bt. el-Hâc Eyüb tarafından vekîl-i şer‘îsi olan Hüseyin Bey b. Mustafa nâm kimesne meclis-i şer‘de Ahmed b. Yusuf nâm şâbb-ı emred mahzarında üzerine da‘vâ ve takrîr-i kelâm edip mezbûr Ahmed târih-i kitâbdan dört gün mukaddem sâkin olduğum menzilimde işbu hazır bi’l-meclis olup müvekkilem gāibe-i mezbûre Muhtâre’nin abd-i memlûkü olan Yusuf b. Abdullah nâm şâbb-ı emredin bir kese içinde on bir buçuk esedî guruş ve üç riyâlî guruş ve üç guruşluk sümün ve iki zolota ve sekiz yüz nakd akçe ki cem‘an iki bin sekiz yüz seksen akçesini dolabdan hufyeten ahz edip firâr etmiş idi. Hâlâ ahz eyledim suâl olunsun dedikde gıbbe’s-suâl mezbûr Ahmed cevâbında fi’l-hakīka târih-i mezbûrdan müvekkile-i merkūmenin abd-i memlûkü olan mezbûr Yusuf’un bir kese içinde iki bin sekiz yüz seksen akçesini zikrolunan dolab içinden hufyeten ahz u kabz edip altı yüz seksen akçesini kendi mesârifime sarf eyledim deyü bi-tav‘ihiikrâr ve i‘tirâf edip ikrârı mûcebince mevcûd olan akçenin def‘ine ve harc eylediği altı yüz seksen akçenin dahi müdde‘î-yi mezbûr Hüseyin Bey’e teslîmine mezbûr Ahmed’e tenbîh birle mâ-vaka‘a bi’t-taleb ketb olundu. Fi’s-sânî aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ali Bey b. Hüseyin, es-Seyyid Ali Çelebi b. es-Seyyid Ramazan, Hüseyin Bey b. Mustafa, Ahmed Beşe b. Sefer, Mustafa b. Mehmed.