İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 383 Hüküm no: 391 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanık ev arsasının kullanım hakkı mütevelli izniyle Ömer b. Ali tarafından Mahmut Ağa’ya satılması Mütevellî izniyle iki bin akçeye ferâğ arsa. Mahmiye-i İstanbul’da Kalenderhâne mahallesinde sâkin el-Hâc Ömer b. Ali meclis-i şer‘-i hatîrde gulâm-ı acemiyân çorbacılarından on bir bölüğün çorbacısı olan işbu râfi‘u’l-kitâb fahrü’l-akrân Mahmud Ağa b. Hasan mahzarında ikrâr ve takrîr-i kelâm edip mahalle-i mezbûrede vâki‘ merhûm Dizdâr Ahmed Bey nâm sahibü’l-hayrın vakfından icâre-i mu‘accele ve senede üç yüz altmış akçe ücret-i maktû‘ası olup bir tarafdan ba‘zan bir tarafı Mehmed Çelebi b. Ali ve ba‘zan el-Hâc Mehmed mülkleri ve bir tarafdan Hüseyin Efendi bin Ahmed tasarrufunda olan vakf menzile ve iki tarafdan tarîk-i âm ile mahdûd olup müceddeden binâ olunan dört tarafında arşın taş duvarı ve sâir enkāzı müştemil ve muhterik ve tasarrufumda olan menzil arsanın hakk-ı tasarrufunu mütevellî-yi vakf-ı mezbûr izniyle elli bin akçeye mezbûr Mahmud Ağa’ya ferâğ ve tefvîz ol dahi minvâl-i muharrer üzere tefevvüz ve kabûl eyledikden sonra bedel-i tefvîz olan meblağ-ı mezbûru tamamen mezbûr Mahmud Ağa yedinden alıp kabz eyledim. Ba‘de’l-yevm arsa-i mahdûd-ı mezbûre merkūm Mahmud Ağa’nın hakk-ı müfevvazıdır. Emsâli tasarrufu gibi mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Hasan Efendi b. Ahmed el-müderris, Mehmed Çelebi b. Ali, Osman Efendi b. ( ) el-müezzin, Mahmud Efendi b. ( ) el-imâm, Ali b. Hasan, Mehmed Çelebi b. Süleyman, el-Hâc Hasan b. Abdullah, Yusuf b. Hüseyin, İlyas b. ( ) el-müezzin, Ali Beşe b. Ahmed.