İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 384 Hüküm no: 392 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kenan b. Abdullah’ın İbrahim b. Mehmed’e ibrişim parasından kalan borcunu ödemesi Yemîn. Mahmiye-i İstanbul’da Kebeciler Hanı’nda sâkin râfi‘u’l-kitâb İbrahim b. Mehmed mahfil-i kazâda Kenan b. Abdullah mahzarında üzerine da‘vâ ve takrîr-i kelâm edip mezbûr Kenan zimmetinde yedimden müşterâ ve makbûz ibrişim semeninden iki yüz elli akçe ve gāib ani’l-meclis Osman nâm kimesne bana havâle-i şer‘iye eylediği dört bin akçenin bin dört yüz akçesini ahz u kabz edip meblağ-ı bâkī iki bin altı yüz akçe ile meblağ-ı sâlifü’z-zikr iki yüz elli akçeyi taleb ederim suâl olunsun dedikde gıbbe’s-suâl mezbûr Kenan cevâbında müdde‘î-yi mezbûr İbrahim’den aldığı ibrişim semeninden iki yüz elli akçe ve cihet-i havâleden ancak üç bin akçe ki cem‘an üç bin iki yüz elli akçeyi ikrâr lâkin gāib-i mezbûr Osman’a havâle eylediği dört bin akçenin bin akçesini inkâr etmeğin müdde‘î-yi mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin gāib-i mezbûr Osman’ın merkūm Kenan zimmetinde kâmil dört bin akçe hakkı olup mezbûr İbrahim’e havâle etmediğine mezbûr Kenan’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin ikrârı mûcebince meblağ-ı mezbûr bin sekiz yüz elli akçeyi müdde‘î-yi mezbûra edâ ve teslîme mezbûr Kenan’a tenbîh olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Abdi bin Halil el-müezzin, Kasab Mustafa b. Mehmed, Gazanfer b. Tevekkül, Rasûl b. Rıdvan, Veli b. Süleyman.