İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 389 Hüküm no: 400 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun evkafından olup Borovik v. Sergiz’in tasarrufunda olan evin ölümü üzerine küçük oğlu Mardiros’un ihtiyacı için mütevelli izniyle Kirkor v. Vartan’a satıldığı Mübâya‘a-i menzil. Mahmiye-i İstanbul’da Hamamcı Muhyiddin mahallesinde vâki‘ merhûme Hadîce Hatun evkāfından bir tarafdan Kiremitçi Kazer menzili ve bir tarafdan Canbaz Vartan menzili ve bir tarafdan Sırmakeş Yanaki menzili ve bir tarafdan tarîk-i âm ile mahdûd iki bâb fevkānî ve iki bâb tahtânî oda ve bir şecere-i dutu hâvî ve kenîfi müştemil menzil Borovik v. Sergiz nâm zimmînin ile’l-helâk icâreteyn-i ma‘lûmeteyn ile taht-ı tasarrufunda olup ba‘de helâkihî intikāl-i âdî ile kebîr oğulları Panos ve Kirkor ve sagīr oğlu Mardiros ve kebîre kızı Turfanda’ya intikāl eylediği şer‘an zâhir oldukdan sonra mezbûrûn Panos ve Kirkor ve Turfanda ve sagīr-i merkūmun kıbel-i şer‘den mansûb vasîsi Marat meclis-i şer‘de işbu râfi‘u’l-kitâb Kirkor v. Vartan nâm zimmî muvâcehesinde asâleten ve vesâyeten her biri ikrâr-ı tâm ve takrîr-i kelâm edip sagīr-i mezbûrun menzil-i mezkûrda olan rub‘ hissesinden mâ‘adâ ism-i mâl ıtlâk olunur bir şeyi olmayıp zarûret-i nafaka ve kisvesi’çün zikrolunan rub‘ hissesinin şer‘an âhara tefvîzi lâzım gelmeğin bundan akdem mahdûd-ı menzil-i mezbûr sûk-ı sultanîde müzâyede olunup ragabât-ı nâs bi’l-külliye münkatı‘a oldukda mecmû‘-ı menzil-i mezkûr merkūm Kirkor’un üzerinde on bin akçeye karâr edip ziyâde bir akçe ile tâlib-i âhar olmamağın menzil-i mahdûd-ı mezbûr asâlet [ve] vesâyetimiz hasebiyle merkūm Kirkor’a on bin akçeye izn-i mütevellî ile ferâğ ve tefvîz ol dahi tefevvüz ve kabûl eyledikden sonra bedel-i tefvîz olan meblağ-ı mezbûru tamamen yedinden alıp kabz eyledik emsâli tasarrufu gibi mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Mustafa Efendi el-imâm, Ahmed b. Abdullah, Attar Mehmed Çelebi, Ali Dede, Attar Ali Beşe, Veli [b.] Mahmud, Arpacı Mehmed Beşe Abdi Çelebi b. Hüseyin, Minas v. Safer, Sergiz v. Avanos, Davit v. Karabetşah, Mardiros v. Safer.