İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 388 Hüküm no: 399 Orijinal metin no: [50a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habib Beşe b. Halil’in Fâtıma bt. Hasan’ı boşadığında küçük kızı için vermesi gereken parayı üç sene geçmesine rağmen vermemesi üzerine açılan dava üzerine biriken parayı vermesi için tenbih edildiği Nafaka-i mefrûzayı ikrâr. Mahmiye-i İstanbul’da Muhtesib Karagöz mahallesinde sâkine Fâtıma bt. Hasan nâm Hatun meclis-i şer‘de zevc-i mutallıkı Habib Beşe b. Halil nâm bevvâb-ı sultanî mahzarında da‘vâ ve takrîr-i kelâm edip mezbûr Habib Beşe târih-i kitâbdan üç sene mukaddem beni talâk-ı bâyin ile tatlîk eyledikde işbu firâşından mütevellide sagīre kızım Rukiye’nin hâlâ yedimde olan hüccet-i şer‘iye mûcebince nafaka ve kisvesi’çün farz ve ta‘yîn olunan yevmî dörder akçeden üç senede dört bin üç yüz yirmi akçe müctemi‘ olup meblağ-ı mezbûrdan bin yüz akçesini mezbûr Habib Beşe yedinden ahz u kabz edip meblağ-ı bâkī üç bin iki yüz yirmi akçe zimmetinde kalmış idi. Hâlâ meblağ-ı bâkī-yi mezbûru merkūmdan taleb ederim suâl olunsun dedikde gıbbe’s-suâl mezbûr Habib Beşe cevâbında kazıyye ber-minvâl-i muharrer olduğunu bi-tav‘ihiikrâr ve i‘tirâf etmeğin ikrârı mûcebince meblağ-ı bâkī üç bin iki yüz yirmi akçeyi müdde‘iye-i mezbûre Fâtıma’ya edâ ve teslîme merkūm Habib Beşe’ye tenbîh birle mâ-vaka‘a bi’t-taleb ketb olundu. Fi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Abdullah b. Mustafa, İbrahim b. Mehmed, Abdi b. Hüseyin, Veli bin Mahmud, Rasûl b. Rıdvan, Ahmed b. Abdülcabbar, Mustafa Çelebi b. İsa, Hüseyin bin Receb.