İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 390 Hüküm no: 402 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe b. Abdülmennan’nın Oruc Beşe b. Osman’dan satın aldığı Rus asıll cariye Timurhan’ın sara hastası olduğunun anlaşılması üzerine iade edilmesi Redd-i câriye ve yemîn. Mahmiye-i İstanbul’da vâki‘ Hoşkadem mahallesinde sâkin bâ‘isü hâze’l-kitâb Osman Beşe b. Abdülmennan mahfil-i kazâda esirci tâifesinden Oruc Beşe b. Osman mahzarında üzerine da‘vâ ve takrîr-i kelâm edip târih-i kitâbdan yirmi beş gün mukaddem mezbûr Oruc Beşe işbu hâzıra bi’l-meclis Rusiyetü’l-asl Timurhan nâm câriyeyi cemî‘ uyûbdan sâlime olmak üzere yüz on dokuz esedî guruşa bana bey‘ ve teslîm ve kabz-ı semen ben dahi vech-i muharrer üzere iştirâ ve kabz ve kabûl etmiş idim. Lâkin târih-i kitâbdan üç gün mukaddem câriye-i mezkûre Timurhan’ın sar‘a marazı ile marîza olduğuna muttali‘ oldum. Hâlâ câriye-i mezkûre mezbûr Oruc Beşe’ye redd ü teslîm ve semen-i mezkûr yine bana def‘ ü teslîm olunmak matlûbumdur suâl olunsun dedikde gıbbe’s-suâl mezbûr Oruc Beşe cevâbında fi’l-hakīka târih-i mezkûrda câriye-i mezbûreyi merkūm Osman Beşe’ye cemî‘ uyûbdan sâlime olmak üzere meblağ-ı mezbûr yüz on dokuz esedî guruşa bey‘ ve teslîm ve kabz-ı semen eyledim. Lâkin câriye-i mezkûrenin maraz-ı mezkûr ile marîza olduğu ma‘lûmum değildir deyü ber-minvâl-i muharrer câriye-i mezkûreyi bey‘ ve kabz-ı semen eylediğini ikrâr lâkin hîn-i bey‘de maraz-ı mezbûr mevcûd olduğunu inkâr etmeğin müdde‘î-yi mezbûrdan müdde‘âsını mübeyyin beyyine taleb olundukda hâssa etibbâdan Ahmed Efendi b. Mehmed ve Mustafa Efendi b. Mehmed meclis-i şer‘a hâzırân olup isre’l-istişhâd mezbûrân fi’l-hakīka işbu câriye-i mezkûre sar‘a marazı ile marîzadır ve maraz-ı mezkûr yirmi beş günde hâdis olur maraz değildir kadîmdir biz bu husûsa bu vech üzere şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyeti’l-kabûl şehâdetleri makbûle oldukdan sonra câriye-i mezkûrenin zikrolunan marazına muttali‘ oldukdan sonra câriye-i mezkûreyi istihdâm etmeyip kavlen ve fi‘ilen kendiden kabûlüne müş‘ir ahvâl sâdır olmadığına mezbûr Osman Beşe’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Mustafa Çelebi b. Hasan, Halil b. Musa, Mehmed Halîfe el-müezzin, Mustafa Beşe b. Ahmed, Ali Beşe b. Abdullah, Osman Bölükbaşı.