İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 393 Hüküm no: 407 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Plepos v. Cömerd’in pamuk ipliği parasından Mardiros v. Avadik’te olan alacağının varisleri’ne ödenmesi Yemîn. Mahmiye-i İstanbul’da Vâlide Hanı’nda sâkin iken bundan akdem hâlik olan Plepos v. Cömerd nâm Ermeninin verâseti li-ebeveyn er karındaşı Agya ve li-ebeveyn kız karındaşları Benefşe ve Zeçel nâm Nasrâniyelere münhasıra olup kable’l-kısme Agya dahi hâlik olup verâseti zevce-i metrûkesi Hanzaka’ya ve sulbî sagīr oğlu Kirkor’a münhasıra olduğu şer‘an zâhir ve müte‘ayyin oldukdan sonra sagīr-i mezbûrun kıbel-i şer‘den mansûb vasîsi ve merkūmân Hanzaka ve Zeçel ve Benefşe taraflarından husûs-ı âti’l-beyâna vekîlleri olan mezbûre Benefşe’nin zevci işbu bâ‘isü’s-sifr Matos v. İskender nâm Ermeni mahfil-i kazâda Mardiros v. Avadik nâm Ermeni muvâcehesinde vesâyeten ve vekâleten üzerine da‘vâ ve takrîr-i kelâm edip hâlik-i merkūm Plepos’un mersûm Mardiros zimmetinde beynlerinde ma‘lûm penbe ipliği semeninden bâkī altmış guruş hakkı olup kable’l-ahz merkūm Plepos hâlik olmağla meblağ-ı mezbûr verese-i merkūmûna ırsen intikāl eylemiş idi. Hâlâ meblağ-ı mezbûru vesâyeten ve vekâleten taleb [ederim] suâl olunsun dedikde gıbbe’s-suâl mezbûr Mardiros cevâbında kazıyye vech-i muharrer üzere olduğunu ikrâr lâkin târih-i kitâbdan üç gün mukaddem meblağ-ı mezbûr altmış guruşu gāib ani’l-meclis Mardiros v. İskender nâm Ermeniden vekîl-i mezbûra üçümüz bu meclisde iken havâle-i şer‘î ile havâle edip ol dahi kabûl eyledi deyü def‘le mukābele edecek gıbbe’l-istintâk ve’l-inkâr mezbûr Mardiros’a def‘-i mezbûru mübeyyin beyyine taleb olundukda ityân-ı beyyineden izhârı acz edip istihlâf etmeğin fi’l-vâki‘ mezbûr Mardiros meblağ-ı mezbûr altmış guruşu merkūm Mardiros’dan üçü bir meclisde iken târih-i mezbûrda havâle edip ol dahi havâle-i mezbûreyi kabûl etdikde merkūm Matos’a yemîn teklîf olundukda ol dahi alâ-vefki’l-mesûl yemîn billâhillezî enzele İncîle alâ-İsa aleyhi’s-selâm etmeğin mûcebince meblağ-ı mezbûr altmış guruşu vekîl-i mezbûr Matos’a edâ ve teslîme tenbîh birle mâ-vaka‘a bi’t-taleb ketb olundu. Fi’s-sâdis aşer min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: es-Sâbıkūn