İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 393 Hüküm no: 406 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitci Kiryako v. Apostol’un ortağı Griçso v. Mihal’e açtığı alacak davasının kabul edilmediği Yemîn. Mahmiye-i İstanbul’da Simidci tâifesinden Kiryako v. Apostol nâm zimmî meclis-i şer‘de şerîki Griçso v. Mihal nâm zimmî muvâcehesinde üzerine da‘vâ edip bundan akdem mezbûr ile yedi nefer zimmîler simidcilik sanatıyla şerîkler olup hâsıl olan fâideyi şart eylediğimiz üzere beynimizde taksîm eylediğimizde hesâbda galat olup mezbûr dezgâhdâr olmağla yedinde olan üç bin akçe fâide bâkī kalıp meblağ-ı mezbûrdan benim hisseme isâbet eden bin sekiz yüz elli yedi akçeyi mezbûr Griçso’dan taleb ederim suâl olunsun dedikde gıbbe’s-suâl mezbûr Griçso ba‘de küllî hesâb yedinde olan üç bin akçe fâide kaldığını <> bi’l-külliye inkâr edicek müdde‘î-yi mezbûrdan müdde‘âsını mütebeyyin beyyine taleb olundukda ityân-ı beyyineden âciz olup istihlâf eyledikde mezbûr Griçso hesâbında galat olmağla yedinde on üç bin akçe fâide bâkī kalmadığına ba’de’t-tahlîf yemîn billâhillezî enzele İncîle alâ-İsa aleyhi’s-selâm etmeğin mezbûr Kiryako bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’s-sâdis aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Mustafa Efendi el-kâtib, Mustafa Çelebi b. Mehmed, Mustafa Çelebi b. Mehmed, Abdi Çelebi b. Hüseyin, Mustafa b. İsa, Veli b. Mahmud.