İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 395 Hüküm no: 410 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mahmud’un Musa Beşe’den satın aldığı evden kalan borcun ertelenmesi İsticâl. Mahmiye-i İstanbul’da Altıpoğaça mahallesinde sâkine Âişe bt. Mahmud nâm hatun meclis-i şer‘de işbu bâ‘isü’l-kitâb Musa Beşe b. İbrahim mahzarında bi-tav‘ihâ ikrâr ve takrîr-i kelâm edip mezbûr Musa Beşe’den mahalle-i merkūmede vâki‘ babası oğlu Mustafa Çelebi evkāfından olup icâre-i mu‘accele ve mü’eccele-i ma‘lûmeteyn ile lede’l-ahâlî ve’l-cîrân ma‘lûmü’l-hudûd on bin akçeye tefevvüz eylediğim menzil bedelinden ba‘de küllî hesâb bin üç yüz akçe deynim olup meblağ-ı mezbûru hâlâ edâya iktidârım olmayıp isticâl etmekle meblağ-ı mezbûrun üç yüz akçesini on gün tamamına değin ve bin akçesini dahi târih-i kitâbdan doksan gün tamamına değin mezbûr Musa Beşe tecîl eyleyip ben dahi ecel-i mezbûru kabûl ve deyn-i mezkûru edâya ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Receb Çelebi b. Hasan el-müezzin, Süleyman Çelebi b. Hasan, İslâm Beşe bin Hasan, Mehmed b. Ebîbekir, Mustafa b. İlyas