İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 399 Hüküm no: 416 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyucubaşı Yusuf Ağa b. Abdullah’ın satması için Avraham v. Menahim’e verdiği zümrütü satmadan iade ettiği Madde-i zümrüd. Hâlâ Kuyumcubaşı olan Yusuf Ağa b. Abdullah meclis-i şer‘de Avraham v. Menahim muvâcehesinde üzerine da‘vâ ve takrîr-i kelâm edip mezbûr Avraham bundan akdem bey‘ edivermek için yedi yüz guruş kıymetli ipe dizilmiş yüz kırat zümrüd teslîm etmiş idim. Hâlâ suâl olunup istihlâki sebebi ile kıymet-i şer‘iyesini taleb ederim dedikde gıbbe’s-suâl mezbûr Avraham cevâbında vech-i muharrer üzere bey‘ edivermek için ipe dizilmiş zümrüdü ahz u kabz edip lâkin bey‘ eylememekle yine mezbûr Yusuf Ağa’ya bi-aynihî teslîm eyledim deyicek mezbûr Avraham emîn olup yemîni ile musaddak olmağla mezbûr Yusuf Ağa yemîni dahi vermemeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Ramazani’l-mübârek li-sene isneyn ve seb‘în ve elf. Şuhûdü’l-hâl: es-Sâbıkūn