İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 398 Hüküm no: 415 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Şahbaz isimli cariyesinin satışına kızı Havva için kefil olan Payidar bt. Abdullah’ın kalan borcu Mustafa Çelebi b. Mehmed’e vermesi için tenbih edildiği Yüz guruşu edâya tenbîh. İşbu râfi‘u’r-rakīm Mustafa Çelebi b. Mehmed meclis-i şer‘de Payidar bt. Abdullah mahzarında üzerine da‘vâ ve takrîr-i kelâm edip mezbûre Payidar’ın sadriye kebîre kızı gāibe ani’l-meclis Havva’ya Rusiyetü’l-asl Şahbaz nâm câriye-i memlûkemi yüz yirmi kıt‘a riyâlî guruşa bey‘ ve teslîm ol dahi iştirâ ve kabûl eyledikden sonra meblağ-ı mezbûrun yirmi guruşunu asîl-i mezbûre Havva’dan ahz u kabz edip bâkī yüz guruşu mezbûre Payidar’dan bi-hükmi’l-kefâle taleb ederim suâl olunsun dedikde gıbbe’s-suâl mezbûre Payidar cevâbında fi’l-vâki‘ meblağ-ı mezbûre vech-i muharrer üzere emr ve kabûlü hâviye kefâlet-i sahîha ile kefîl olduğunu bi-tav‘ihâ mu‘terif olmağın mûcebince meblağ-ı mezbûru müdde‘î-yi mezbûra teslîme merkūme Payidar’a tenbîh birle mâ-vaka‘a bi’t-taleb ketb olundu. Fi’s-sânî aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Abdi b. Hüseyin, Mehmed b. Ramazan, Mustafa b. İsa, Hasan b. Bayram, Mahmud b. Hüseyin.