İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 411 Hüküm no: 434 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin Avlonya’nın Iskırapar kasabasında bulunan ev ve talalarını damadı Ali Beşe’ye sattığı ve alacağının kalmadığı İbrâ-i tarafeyn. Vilâyet-i Rumeli’nde Avlonya sancağında vâki‘ Iskırapar kasabasına tâbi‘ Kakırkon nâm karye sâkinlerinden olup hâlâ mahmiye-i İstanbul’da Zeyrek kurbünde Hacı Kadın hamamında mütemekkin Dellâk Hasan Beşe nâm kimesne meclis-i şer‘de dâmadı Ali Beşe b. Sinan mahzarında ikrâr ve takrîr-i kelâm edip silk-i mülk-i sahîhimde münselik olup karye-i mezbûrede vâki‘ bir tarafdan Hüseyin Bey nâm kimesne mülküne ve bir tarafdan dereye ve taraf-ı râbi‘i tarîk-i âmma müntehî içinde bir bâb oda ve bir matbah ve bir kilâr ve bir samanlığı ve zât-ı eşcâr-ı müsmire ve gayr-ı müsmireyi müştemil ve harman yerini hâvî çiftliğimin nısf şâyi‘i ba‘de’l-ifrâz ve’t-ta‘yîn tarafeynden îcâb ve kabûlü hâvî bey‘-ı bâtt-ı sahîh ile üç bin fıddî râyic fi’l-vakt akçeye ba‘demâ mezbûr Ali Beşe’ye bey‘ ve teslîm ol dahi ber-minvâl-i muharrer iştirâ ve tesellüm eyledikden sonra semeni olan meblağ-ı mezkûr zimmetinde kalmış idi. Hâlâ meblağ-ı mezkûrdan zimmetini ibrâ ve ıskāt eyledim ve yine karye-i mezbûr sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a tarlalarımın dahi ba‘de’l-ikrâr nısf şâyi‘inin hakk-ı karâr [ve] tasarrufunu sahib-i arz ma‘rifetiyle mukaddemâ dâmadım mezbûr Ali Beşe’ye üç bin akçe bedel mukābelesinde ferâğ ve tefvîz edip ol dahi ber-minvâl-i muharrer tefevvüz ve kabûl ve tesellüm edip bedel-i mezbûr merkūm zimmetinde kalmış idi. Hâlâ bedel-i mezbûr üç bin akçeden mezbûr Ali Beşe’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Hüseyin Bey b. Hasan, Selim Bey b. Hüseyin, Hasan Bey b. Ali, Mumcuzâde Mehmed Bey, Ali Beşe b. Hasan, İbrahim Beşe b. Hüseyin, Kemâl Beşe b. Kasım, Süleyman Beşe b. Mehmed.