İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 410 Hüküm no: 433 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mizistre Kadısı Halil tarafından usulsüz para alındığı iddiasıyla Mizistre kasabasına bağlı bazı köylerin halkı tarafından açılan davanın anlaşmayla sonuçlandığı Sulh guruş 220 aded. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Nişancı Cafer mahallesinde vâki‘ Dergâh-ı âlî kapıcıları başılarından umdetü’l-emâcid ve’l-ekârim Yahya Bey’in menziline varıp zeyl-i rakīmde mastûrü’l-esâmî olan Müslimîn huzûrunda akd-i meclis-i şer‘ eyledikde vilâyet-i Rumeli’nde cezîre-i Mora’da Mizistre kasabasına tâbi‘ Hrisafa nâm karye-i sükkânından olup Kamar v. Nikola ve karye-i Gor sükkânından Anagno b. Serandi ve karye-i Kozma sükkânından Dimo ve Karakaş ve karye-i Kastaniçe sükkânından Papa Nikola v. ( ) ve karye-i Komosto sükkânından Papa Dimitri Laskari ve karye-i Koniçe sükkânından Vuk İspilati ve karye-i Vordonyo sükkânından Todori ve Avaniki nâm zimmîler kendi taraflarından asîl ve sâir ma‘lûmü’l-eşhâs ve’l-esâmî kurâ ahâlîsi taraflarından zikri âtî meblağ ve da‘vâ ve talebe ve lâzım gelirse sulha vekîlleri olup Mehmed b. Ahmed ve Yusuf b. Hasan şehâdetleri ile şer‘an vekâleti sâbite oldukdan sonra meclis-i ma‘kūd-ı mezbûrda sâbıkā Mizistre kādısı olan işbu sahibü’l-kitâb zübdet-i kuzâtü’l-islâm Halil Efendi b. İbrahim mahzarında her biri asâleten ve vekâleten ikrâr ve takrîr-i kelâm edip merkūm Halil Efendi bin yetmiş bir ve yetmiş iki senelerinde kazâ-i mezbûrede kādı iken kazâ-i mezbûre zimmîleri üzerlerinde edâsı lâzım gelen cizye hânelerinden altışar akçe ve avârız ve nüzûl hânelerinden yirmi beş akçe resm-i mu‘tâd deyü kendi için ahz u kabz etmeğin meblağ-ı mezbûru merkūm Halil Efendi’den taleb ve da‘vâ eylediğimizde ol dahi inkâr etmekle beynimizde münâza‘ât-ı kesîre vâki‘ olmuş idi. El-hâletü-hâzihî vesâtet-i muslihûn tavassut edip da‘vâ-yı mezbûreden bizler iki yüz yirmi riyâlî guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûru asâleten ve vekâleten kabûl ve mezbûr Halil Efendi yedinden bi’t-tamam ahz u kabz eyledik. Ba‘de’l-yevm merkūm Halil Efendi ile husûs-ı mezbûra müte‘allika da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mahmud Çelebi b. Ahmed ile meclis-i şer‘a gelip alâ-vukû‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Fahrü’l-a‘yân Yahya Bey b. ( ) Ser-kapıcıyân-ı Dergâh-ı âlî, Fahrü’l-akrân Hasan Ağa, ser-kapıcıyân-ı mezbûr, Umdetü’l-a‘yân Hasan Ağa, tâbi‘-i Sadr-ı âlî, Fahrü’l-kuzât Mustafa Efendi b. Ebûbekir Efendi, Yahya Efendi b. Yusuf, Mehmed Ağa b. Abdülkerim, Mehmed Efendi b. Mahmud el-kādî, Kurd Efendi b. Abdülkadir Efendi el-kādî.