İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 413 Hüküm no: 438 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yagob v. Marat’ın Kayser v. Safir’den satın aldığı katırın hastalıklı çıkması üzerine açtığı davada haklı bulunduğu Da‘vâ-yı katır, nükûl-i yemîn. Mahmiye-i İstanbul’da Horhor kurbünde Canbaz tâifesinden Yagob v. Marat nâm Ermeni meclis-i şer‘de Canbaz tâifesinden işbu hâmilü’s-sifr Kayser v. Safir nâm Ermeni muvâcehesinde üzerine da‘vâ edip târih-i kitâbdan altmış gün mukaddem işbu bir re’s kır katırı sâlimen ani’l-uyûb mezbûr Kayser’den iki bin dört yüz akçeye iştirâ ve kabz ve def‘-i semen eylemiş idim. Hâlâ katır-ı mezbûrun beli ve dört ayağı illetli olmağla mu‘ayyebe olduğuna muttali‘ oldum. Ayb-ı mezbûr inde’t-tüccâr noksan semeni îcâb eder ayb-ı kadîm olduğu ecilden reddolunup def‘ eylediğim semeni mezbûrun alıverilmesi murâdımdır suâl olunsun dediğinde gıbbe’s-suâl cevâbında mezbûr Kayser katır-ı mezbûru ayıbına muttali‘ oldukdan sonra bey‘a arz olunmuşdur deyü def‘le mukābele edecek müdde‘î-yi mezbûrdan def‘-i mezbûrunu mübeyyin beyyine taleb olundukda ityân-ı beyyineden izhâr-ı acz edip istihlâf etmeğin müdde‘î-yi mezbûr Yakob’a işbu katırı bey‘a arz etmediğine yemîn teklîf olundukda ol dahi yemîninden nükûl etmeğin bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’’s-sâbi‘ ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Osman Çelebi b. Abdullah, Mehmed b. Ramazan, Mustafa b. Mehmed, Mustafa b. Ahmed, Gazanfer b. Tevekkül.