İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 414 Hüküm no: 439 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep’te ölen Salih Efendi’nin terekesi Vilâyet-i Anadolu’da medîne-i Haleb’de müsâfiren fevt olan Salih Efendi b. Salih’in verâseti zevce-i metrûkesi Naime bt. Mehmed Ali nâm hatun ile sulbî sagīr oğlu Ahmed’de münhasıra olduğu şer‘an sâbite oldukdan sonra mezbûre Naime Hatun tarafından husûs-ı âtîye vekâlet iddi‘â eden el-Hâc Ahmed Efendi b. Hızır ile ber-vech-i câ’î vasîyy-i muhtâr olduğunu iddi‘â eden Mehmed Ali Çelebi b. Mehmed nâm kimesne meclis-i şer‘de Sultan Han hazretleri Câmi‘-i şerîfinde kayyûmbaşı olup müteveffâ-yı mezbûrun muhallefâtına bi’l-emâne vâzı‘u’l-yed olduğu sâbit olan Mustafa Halîfe b. Receb mahzarında her biri üzerine da‘vâ edip müteveffâ-yı mezbûrun muhallefâtından mezbûr Mustafa Halîfe yedinde sepet sandığı içinde mevcûd olan on dört bin nakd akçe ile iki bin akçe kıymetli eşyânın semeni ırsen mezbûre Naime’ye ve mâ‘adâsı sagīr-i mezbûra intikāl etmekle vekâleten ve vesâyeten taleb ederiz suâl olunsun dediklerinde gıbbe’s-suâl mezbûr Mustafa Halîfe cevâbında ber-minvâl-i muharrer bi’l-emâne on altı bin akçe muhallefâtına vaz‘-ı yedin ikrâr lâkin mezbûre Naime Hatun zevcesi ve sagīr-i mezbûr sulbî oğlu ve hasran vârisleri olup muhallefât-ı müteveffâ-yı mezbûrdan kendiye intikāl eden semeni ba‘de’d-da‘vâ kendiye teslîme mezbûr el-Hâc Ahmed Efendi’yi vekîl eylediği ve sagīr-i mezbûra merkūm Mehmed Çelebi’yi vasîyy-i muhtâr nasbedip musırrân alâ-tilke’l-vesâye fevt olduğunu inkâr eyledikde mezbûrândan müdde‘âları için beyyine taleb olundukda udûl-i Müslimînden olup zât-ı mezbûreyi şer‘an ârifân fahrü’l-kuzât Mustafa Efendi b. Mehmed ve Mehmed Çelebi b. Hasan ve Mehmed Ali Çelebi b. Ahmed ve Yusuf Çelebi b. Yusuf nâm kimesneler li-ecli’ş-şehâde meclis-i şer‘a hâzırûn olup gıbbe’l-istişhâdi’ş-şer‘î fi’l-vâki‘ mezbûre Naime Hatun müteveffâ-yı mezbûr Salih Efendi’nin zevcesi ve sagīr-i mezbûr Ahmed sulbî oğludur verâseti mezbûrâna münhasıradır mezbûre Naime Hatun müteveffâ-yı mezbûrun muhallefâtına onlardan sümün hissesini ba‘de’d-da‘vâ kabz ve kendiye teslîme mezbûr el-Hâc Ahmed Efendi huzûrumuzda vekîl eyledi ve müteveffâ-yı mezbûr Salih Efendi hâl-i sıhhatinde mezbûr Mehmed Ali Çelebi fevtimden sonra oğlum sagīr-i mezbûr Ahmed’e vasîyy-i muhtârım olup mâlını hıfz eylesin deyü mezbûr Mehmed Ali Çelebi’yi vasîyy-i muhtâr nasbedip musırrân alâ-tilke’l-vasiyye fevt olup biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâiti’l-kabûl şehâdetleri makbûle oldukdan sonra meblağ-ı mezbûrdan iki bin akçe sümününü vekîl-i mezbûr el-Hâc Ahmed ve bâkī kalan dört bin akçesini vasîyy-i mezbûr Mehmed Çelebi’ye teslîme mezbûr Mustafa Halîfe’ye tenbîh olundukdan sonra mezbûrân el-Hâc Ahmed ile Mehmed Ali Çelebi meclis-i mezbûrda merkūm Mustafa Halîfe mahzarında vekâleten ve vesâyeten ikrâr ve i‘tirâf edip mezbûr yedinde mevcûd olan on altı bin akçe muhallefât-ı müteveffâ-yı mezbûrdan mezbûrenin iki bin akçe sümün hissesini ve sagīr-i mezbûrun bâkī kalan dört bin akçe hissesini kabz edip yedinde bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ahmed Çelebi b. Mustafa, Hüseyin Halîfe b. Receb el-müezzin, Ahmed Çelebi b. Mustafa Bey, Hüseyin Çelebi b. Eyüb, Osman Çelebi b. Mustafa.