İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 421 Hüküm no: 449 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed ile Ahmed Çelebi arasında evlilik öncesi verilen hediyelerin evliliğin gerçekleşmemesi üzerine karşılıklı iade edildiği Vilâyet-i Anadolu’da Samakov kasabasından Fâtıma bt. Mehmed nâm hatun meclis-i şer‘de Ahmed Çelebi b. Ramazan mahzarında takrîr-i kelâm edip mezbûr Ahmed Çelebi bana nâmzed olmağla bana bir şerîfi altın bir lengerî kebîr sahan ve bir pirûze hâtem irsâl edip ben dahi ona bir gömlek ve iki makrama ve bir don ve bir uçkur ve bir boğça irsâl etmiş idim. Lâkin nefsimi âhara tezvîc etmekle ben ahz eylediğim eşyâ-i mezbûreyi kasaba-i mezbûrede merkūm Ahmed Çelebi’ye teslîme ta‘ahhüd edip ol dahi kabz eylediği eşyâ-i mesfûreyi bana teslîme ta‘ahhüd eylediğinden sonra bâlâda tafsîl olunan eşyâlardan gayrı târih-i kitâba gelince beynimizde olan zevciyete müte‘allika benim mezbûr Ahmed Çelebi ile da‘vâ ve nizâ‘ım ve alâka ve medhalim kalmayıp onun dahi benimle da‘vâ ve nizâ‘ı ve alâka ve medhali kalmadı mezbûr Ahmed Çelebi’den suâl olunup takrîri tahrîr olunmak murâdımdır dedikde mezbûr Ahmed Çelebi kazıyye bâlâda tafsîli mürûr etdiği vech üzere olduğunu mu‘terif olmağın vâki‘ hâl bi’t-taleb ketb olundu. Fi’l-hâmis ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Mahmud Efendi b. Mustafa, İbrahim Efendi b. ( ), Mustafa Efendi b. ( ), Ahmed b. Mahmud, el-Hâc İshak b. Hüseyin, Rasûl b. Rıdvan Şaban b. Ahmed.