İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 420 Hüküm no: 448 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manisalı Çelebi mahallesinde bulunan ve annesinden Ayşe Hatun’a ve üveybabasına kalan evin Ayşe Hatun tarafından Fâtıma Hanım’a satılması Kefâlet. Mahmiye-i İstanbul’da Hâfız Paşa Câmi‘-i şerîfi kurbünde sâkine Âişe Hatun bt. Ahmed tarafından husûs-ı câ’i’z-zikre vekîl-i müsecceli olan hâlâ zevci Mehmed Ağa b. Ali meclis-i şer‘-i hatîr-i lâzımü’t-tevkīrde mahmiye-i mezbûrede Altıpoğaça mahallesinde sâkine işbu râfi‘atü’l-kitâb Fâtıma Hanım bt. Mehmed Bey tarafından husûmet ve redd-i cevâba vekîl olup mezbûrenin zâtını ma‘rifet-i şer‘ ile ârifân olan Mustafa Bey b. Mehmed ve Mehmed b. Ali şehâdetleri ile şer‘an vekâleti sâbite olan zevci Altıpoğaça’dan fahrü’l-a‘yân İbrahim Ağa b. Mahmud Efendi mahzarında üzerine bi’l-vekâle da‘vâ ve takrîr-i kelâm edip bundan akdem zevcem müvekkile-i mezbûre Âişe Hatun Manisalı Çelebi mahallesinde lede’l-cirân ma‘lûmü’l-hudûd olup vâlidesinden kendiye intikāl eden menzilini mûmâ-ileyh İbrahim Ağa’nın zevcesi ve müvekkilesi merkūme Fâtıma Hanım’a yüz elli bin akçeye bey‘ edip ol dahi iştirâ ve kabûl eyledikden sonra semeninden yüz otuz beş bin akçesini kabz edip bâkīsi olan on beş bin akçeyi bi’l-vekâle mezbûr İbrahim Ağa’nın müvekkilesinden müvekkilem için taleb ederim suâl olunsun dedikde gıbbe’s-suâl mezbûr İbrahim Ağa cevâbında menzil-i mezbûrun rub‘u mezbûre Âişe’nin üveği babası gāib ani’l-meclis Yusuf Bey’e ve selâse erbâ‘ı mezbûre Âişe’ye vâlidesinden intikāl eylemiş iken mecmû‘-ı menzili müvekkilem kendinin olmak üzere bey‘ eylemişdir suâl olunup derk-i menzile bir kefîl vermedikce semen-i mezbûrdan bâkī kalan meblağ-ı müvekkilem edâ etmez deyücek akībe’l-istintâk vekîl-i mezbûr Mehmed Ağa fi’l-vâki‘ menzil-i mezbûrun selâse-i erbâ‘ı müvekkilesine ve rub‘u müvekkilesinin üveği babası gāib-i mezbûr Yusuf Bey’e vâlidesinden intikāl eylediğini bi’l-vekâle ikrâr etmeğin menzil-i mezbûru derkine ve semen-i mezbûrun bi ayinihi zikrolunan Manisalı Çelebi mahallesinin müezzini olan Mehmed Halîfe b. Mehmed emr ve kabûlü hâviye kefâlet-i sahîha-i şer‘iye ile kefîl ve zâmin oldum dedikde vekîl-i mezbûr Mehmed Ağa mezbûr İbrahim Ağa mahzarında ikrâr edip semen-i mezbûrdan bâkī kalan on beş bin akçeyi meclis-i şer‘de mezbûr İbrahim Ağa yedinden bi’t-tamam müvekkilem mezbûre Âişe Hatun için kabz eyledim dedikde mâ-vaka‘a bi’t-taleb ketb olundu. Fi’s-sâdis ve’l-işrîn min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Hüsameddin Çavuş b. Ali, Ahmed Çavuş b. Bali Mustafa Bey b. Mehmed, Şükrullah b. Mustafa, Mustafa Efendi imâm-ı mahalle-i mezbûre, Baltacı Receb Ağa b. ( ).