İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 422 Hüküm no: 451 Orijinal metin no: [56a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Abdülkerim’in borcu karşılığında evini Mehmed Ağa’ya rehin verdiği Kefâlet. Mahmiye-i İstanbul’da Ahîzâde mahallesi sükkânından Mustafa b. Halil meclis-i şer‘de işbu râfi‘u’l-kitâb umdetü’l-emâcid ve ekârim Mehmed Ağa b. Abdülkerim tarafından ikrâr-ı âti’l-beyânı tasdîka vekîli olan Mustafa Bey b. Ramazan mahzarında ikrâr ve takrîr-i kelâm edip müvekkil-i mûmâ-ileyh Mehmed Ağa’ya zimmetimde cihet-i karz-ı şer‘îden on dört bin akçe vâcibü’l-edâ ve lâzımü’l-kazâ deynim olup meblağ-ı mezbûr mukābelesinde mahalle-i mezbûrede vâki‘ bir tarafı Mustafa Ağa mülkü ve bir tarafı Nâmîzâde vakfı ve bir tarafı Altızâde mülkü ve bir tarafı tarîk-i âm ile mahdûd büyût-ı adîdeyi müştemil menzilimi müvekkil-i mûmâ-ileyh Mehmed Ağa’ya rehin vaz‘ ve teslîm edip ol dahi irtihân ve kabûl ve tesellüm eyledikden sonra mahalle-i mezbûre sükkânından işbu hazır bi’l-meclis Abdülbaki nâm kimesne meblağ-ı mezbûr on dört bin akçeye tarafeynden îcâb ve kabûlü hâviye kefâlet-i sahîha ile kefîl oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi şehr-i Ramazanü’l-mübârek li-sene isneyn ve seb‘în ve elf. Şuhûdü’l-hâl: es-Sâbıkūn.