İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 423 Hüküm no: 452 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afendo bt. Diyako’ya ait mumcu dükkân ve malzemesinin kocası ve vekili Andriya v. Dimo tarafından Apostol v. Papa Dimo’ya satıldığı Ücret-i şem‘hâne, meblağ: 11.000 Vilâyet-i Rumeli’nde Yenişehir kazâsı muzâfâtından Fenâr nâhiyesine tâbi‘ Vranye nâm karye mütemekkinlerinden Anderya v. Dimo nâm zimmî mahfil-i kazâda mahmiye-i İstanbul’da mumcu tâifesinden hâmil-i hâze’s-sifr Apostol v. Papa Dimo nâm zimmî mahzarında üzerine da‘vâ ve takrîr-i kelâm edip mahmiye-i mezbûrede Yedikule’de vâki‘ yine mahmiye-i mezbûrede Çarşamba Pazarı’nda Mahmud Efendi’nin bakkāl dükkânı ile Balat Mahkemesi kurbünde Haremeyn-i muhteremeyn vakfından olan bakkāl dükkânına kadîmden ta‘yînâtı olup bir tarafdan Kasım Ağa selhhânesine ve iki tarafdan meydâna ve bir tarafdan sâhil-i bahra müntehî mumhânenin ve içinde mevcûd kazan ve sâir tencere cins ve aded ve vasfı ma‘lûm cehâleti nâfî mumcu âlâtının dört sehimden bir sehm-i şâyi‘i karye-i mezbûrede mütemekkine zevcem Afendo bt. Diyako’nun mülkü olmağın bundan akdem zikri sebk eden bir sehm-i şâyi‘i bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık zevcem mezbûre Afendo tarafından vekâleten merkūm Apostol’a on bir bin akçeye bâtten bey‘ ve teslîm ol dahi ber-minvâl-i muharrer sehm-i mezbûru benden iştirâ ve tesellüm ve kabûl eylemiş idi. Semeni olan meblağ-ı mezbûru merkūm Apostol bana teslîmden imtinâ‘ eder suâl olunup alıverilmek matlûbumdur dedikde gıbbe’s-suâl merkūm Apostol cevâbında kazıyye minvâl-i muharrer üzeredir lâkin vekîl-i mezbûr Anderya ber-vech-i muharrer husûs-ı mezkûra vekîl olduğunu muvâcehemde isbât-ı vekâlet etmeyince semen-i mezbûru teslîm etmem deyücek vekîl-i mezbûrdan vekâletine beyyine taleb olundukda yine nâhiye-i mezbûreye tâbi‘ Velzovini nâm karye mütemekkinlerinden Yani v. Duka ve diğer Yani v. İstiryatoz ve Kostantin v. Anton nâm mumcu zimmîler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müvekkile-i mezbûre Afendo bundan akdem zevci mezbûr Andriya’yı silk-i mülkünde münselik mahmiye-i mezbûrede Yedikule’de vâki‘ bir tarafdan Kasım Ağa selhhânesine ve iki tarafdan meydâna ve bir tarafdan sâhil-i bahra müntehî mumhânenin ve içinde mevcûd olan kazan ve sâir beynlerinde aded ve cins ve vasfı ma‘lûm cehâleti nâfî mumcu âlâtının dört bölükde bir bölük hisse-i şâyi‘asını semen-i misline bey‘ ve kabz-ı semeni ve kendiye îsâle tarafından bizim huzûrumuzda vekîl ve nâib-i menâb nasb ve ta‘yîn ol dahi kabûl ve hizmet-i lâzımesini edâya ta‘ahhüd eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’iti’’l-kabûl şehâdetleri makbûle olmağın mûcebince ba‘de’l-hükm vekîl-i mezbûr takrîr-i kelâm edip semen-i mezbûr on bir bin akçeyi merkūm Apostol bana def‘ ü teslîm edip ben dahi yedinden tamamen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Arslan Beşe b. Muharrem, Abdi Çelebi b. Hüseyin, Mehmed b. Ramazan, Veli b. Mahmud, Mustafa b. İsa, Angeli v. Yani, Polizo v. Panayot, Tokoş v. Andon, Yani v. Dimo, Dimo v. Yani, Dimitri v. Hıristo, Apostol v. Rizo, Kostantin v. Yako.