İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 424 Hüküm no: 454 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sulumanastır mahallesinden Hanim bt. Habariz’in ölen kocası Marat v. Krişi’de olan alacağını terekesinden talep etmesi İsbât-ı deyn. Mahmiye-i İstanbul’da Sulu Manastır mahallesinde mütemekkin işbu hâmilü’s-sifr Hanim bt. Habariz nâm Nasrâniye meclis-i şer‘-i hatîrde mahalle-i mezbûrede mütemekkin iken bundan akdem hâlik olan zevcim Marat v. Krişe nâm zimmînin sulbiye kızları Asılzat nâm sagīrenin kıbel-i şer‘den mansûb vasîsi olmağla hâlik-i mezbûrun terekesine vâzı‘u’l-yed idiği şer‘an sâbit olan Marat v. Panos zimmî mahzarında üzerine bi’l-vesâye da‘vâ ve takrîr-i kelâm edip zevcim hâlik-i mezbûrun zimmetinde karz-ı şer‘îden üç yüz seksen riyâlî guruş hakkım olup hatta hâl-i sıhhatinde huzûr-ı şuhûdda bana minvâl-i muharrer üzere üç yüz seksen guruş deyni olduğu[nu] ikrâr eylemiş iken meblağ-ı mezbûru kable’l-edâ hâlik oldukdan sonra terekesinden yüz guruşu alıp bâkī kalan iki yüz seksen guruşunu hâlâ tereke-i vâfiyesinden alıverilmek taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyin beyyine taleb olundukda mahalle-i mezbûrede mütemekkinlerinden Avraham Papas v. Kirkos ve Asvador v. Arakil ve Toros v. Avanos nâm zimmîler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müdde‘iye-i mezbûrenin zevci hâlik-i mezbûr hâl-i sıhhatinde zevcem mezbûre Habariz’e zimmetimde karz-ı şer‘îden üç yüz seksen guruş deynim vardır ikrâr ve bizi işhâd eyledi biz bu vech üzere hâlik-i mezbûrun ikrârına şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itü’l-kabûl şehâdetleri makbûle oldukdan sonra meblağ-ı bâkī-yi mezbûru küllen ve ba‘zan ahz ve istifâ veyâ hîbe veyâ turûk-ı şer‘iyeden bir tarîk ile hâlik-i mezbûrun zimmetini ibrâ ve ıskāt etmediğine müdde‘iye-i mezbûreye yemîn teklîf olundukda ol dahi alâ-hüve’l-mesûl halfü billâhillezî enzele’l-İncîle alâ-İsa aleyhi’s-selâm etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâlis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Süleyman Çelebi b. Hasan, Halil b. Lütfullah, Mehmed Efendi b. Osman el-imâm, Mehmed Efendi b. İbrahim el-müezzin, Gazanfer b. Tevekkül ve gayruhum.