İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 425 Hüküm no: 455 Orijinal metin no: [56b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Kasım tarafından Firuzağa mahallesinde bulunan yarım hisse arsanın Mahmud Beşe b. Muharrem’e satıldığı Mübâya‘a. Mahmiye-i İstanbul’da Hayyam Bey mahallesinde sâkin Ahmed Efendi b. Kasım nâm kimesne meclis-i şer‘de hâfızü’l-vesîka Mahmud Beşe b. Muharrem nâm kimesne mahzarında tav‘an ikrâr ve i‘tirâf edip mahmiye-i merkūmede Firuzağa mahallesinde vâki‘ bir tarafı Râbia Hatun bt. Bayram Çavuş mülküne bir tarafı Medîne-i münevvere vakfı olan menzile bir tarafı mezbûr Mahmud Beşe mülküne bir tarafı tarîk-i âmma müntehî olup ber-vech-i iştirâk menzil-i mezbûr Mahmud Beşe ile mutasarrıf olduğum mülk arsa-i hâliyenin nısf şâyi‘ini altı bin akçeye mezbûr Mahmud Beşe’ye bey‘ ol dahi ber-minvâl-i muharrer iştirâ ve kabûl edip semeni olan meblağ-ı mezbûr altı bin akçeyi yedinden kabz eyledim min-ba‘d mârrü’z-zikr nısf hisse-i mezbûr Mahmud Beşe’nin mülk-i müşterâsı olup keyfe mâ yeşâ ve yahtâr mutasarrıf olsun dedikde mukırr-ı mezbûru ikrâr-ı meşrûhunda mezbûr Mahmud Beşe vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fî 24 Şevvali’l-mükerrem sene 1072. Şuhûdü’l-hâl: Hüseyin Efendi el-Burûsîye, Hüseyin b. Ahmed, Mustafa b. Ahmed, Mustafa b. Hüseyin, Ali Beşe bin Hüseyin, Hasan b. Abdullah, el-Hâc Mehmed b. Receb, Ahmed b. Muharrem, Halil bin İlyas.