İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 427 Hüküm no: 457 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahire’den dönerken Lazkiye’de ölen Yusuf b. Muslu’nun terekesi Sulh. Vilâyet-i Anadolu’da medîne-i Ankara’da Hacı Arab mahallesi sâkinlerinden tüccâr tâifesinden olup bundan akdem Mısr-ı Kāhire’de Tais Reis nâm zimmî sefînesiyle gelir iken Lazkiye demekle ma‘rûf iskelede fevt olan Yusuf b. Muslu’nun li-ebeveyn ammi ve hasren verâseti olan Ömer b. Yusuf tarafından husûs-ı câ’i’z-zikre vekîl olup vekâleti yedinde olan nakl-i şer‘î hüccetiyle sâbite olan Halil Bey b. Mehmed meclis-i şer‘de Antalya’da sâbıkā Beytü’l-mâl Emîni olan Hasan Efendi’nin şerîki olup zikri âtî muhallefâtı kabz eden Kasım Ağa tarafından husûs-ı âti’l-beyâna vekîl olup vekâleti el-Hâc Ali b. Veli ve İbrahim Bey b. Malkoç şehâdetleri ile şer‘an sâbite olan işbu râfi‘u’l-kitâb el-Hâc Eyüb b. Abdullah mahzarında bi’l-vekâle ikrâr ve takrîr-i kelâm edip zikri mürûr eden Lazkiye iskelesinde mezbûr Yusuf fevt olup ba‘dehû sefîne-i mezkûre Antalya iskelesine geldikde sefîne-i mezkûrede olan muhallefâtından Antalya’da kassâm olan ( ) Efendi yirmi iki bin yedi yüz kırk altı akçelik on iki çuval kestane ve sâir terekesini tahrîr eyledikden sonra merkūm Kasım Ağa emâneti hasebiyle tereke-i mezbûreyi ahz u kabz etmekle yedimde olan defter-i kassâm-ı mezkûr nâtık olduğu üzere emîn-i mezbûru makbûz olan terekeyi vekîl-i mezbûr el-Hâc Eyüb’den da‘vâ ve taleb eylediğimde ol dahi inkâr ve ben dahi müdde‘âmı muvâcehesinde isbât sadedinde iken beynimizde münâza‘ât-ı kesîre vâkı‘a olmuş idi. El-hâletü-hâzihî beynimizde muslihûn tavassut edip da‘vâ-yı mezbûreden benimle vekîl-i mezbûr el-Hâc Eyüb on bir bin akçe üzerine inşâ-i akd-i sulh eyledikde ben dahi sulh-ı mezbûru bi’l-vekâle kabûl ve bedel-i sulh olan meblağ-ı merkūm on bir bin akçeyi vekîl-i merkūm el-Hâc <> Eyüb yedinden tamamen alıp kabz eyleyip bâkī on bir bin yedi yüz kırk altı akçeden bi’l-vekâle mezbûrân Hasan Efendi’nin ve Kasım Ağa’nın zimmetlerini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şevvali’l-mükerrem li-sene isnâ ve seb‘în ve elf. Şuhûdü’l-hâl: el-Hâc Yusuf b. Abdi, Hüseyin Bey b. Malkoç, Kenan b. Abdullah, el-Hâc Veli b. Mahmud, Rasûl b. Rıdvan.