İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 426 Hüküm no: 456 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem Çelebi tarafından ölmeden önce vakf olmak üzere Ahmet Çelebiye verdiği sonra Ahmet Çelebi’nin ölümü üzerine onda kalan paranın terekesinden alınması için Muharrem Çelebi’nin vasîsi Ramazan’ın talebinin kabul edildiği Mahmiye-i İstanbul’da Debbağzâde mahallesinde sâkin iken bundan akdem vefât eden Muharrem Çelebi nâm kimesnenin vasîyy-i muhtârı olan işbu râfi‘u’l-kitâb Ramazan Efendi b. Zeynelabidin meclis-i şer‘de yine mahalle-i mezkûre sükkânından olup hâlâ vefât eden Ahmed Çelebi’nin metrûkâtına vâzı‘u’l-yed idiği şer‘an zâhir ve sâbit olan sulbî kebîr oğlu ve hasran vârisi Mehmed Efendi mahzarında üzerine da‘vâ ve takrîr-i kelâm edip bin altmış târihinde mezbûr Muharrem Çelebi’nin sülüs mâlından mahalle-i mezbûr avârızı için elli guruş, mescidine imâm olanlara dahi elli guruş ki cem‘an yüz kıt‘a riyâlî guruşu vasiyyet üzere ba‘de vefâtihî vesâyetim hasebiyle mezbûr Mehmed Efendi’nin babası mezbûr Ahmed Çelebi’ye teslîm ol dahi ber-minvâl-i muharrer yüz guruşu yedimden kabz ve tesellüm eylemiş idi. Meblağ-ı mezbûr zimmetinde iken vefât etmeğin vesâyetim hasebiyle terekesinden alıverilmek taleb ederim suâl olunsun dedikde gıbbe’s-suâl mezbûr Mehmed Efendi cevâbında inkâr edicek müdde‘î-i mezbûrdan müdde‘âsını mübeyyin beyyine taleb olundukda udûl-i Müslimînden olup mahmiye-i mezbûrede Çukur mahalle imâmı Hüseyin Efendi bin Abdülfettah ve Mollahüsre[v] mahallesi müezzini Mehmed Halîfe b. İbrahim nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ târih-i mezbûrda müdde‘î-yi mezbûr Ramazan Efendi vasîyy-i muhtârı olduğu mezbûr Muharrem Çelebi’nin sülüs mâlından vasiyyeti üzere mezbûr Mehmed Efendi’nin babası müteveffâ-yı mezbûr Ahmed Çelebi’ye elli guruş mahalle avârızı için ve elli guruş dahi mescidinde imâm olanlar için vakf olmak üzere cem‘an yüz guruşu bizim huzûrumuzda yedine teslîm ol dahi ber-minvâl-i muharrer yedinden kabz ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’iti’’l-kabûl şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fî-gurreti Rebî‘i’l-âhir li-sene isneyn ve seb‘în ve elf. Şuhûdü’l-hâl: Mehmed Beşe b. Himmet, Hacı Hüseyin b. Himmet, Mehmed Beşe b. Sıyâm, Mehmed Halîfe el-müezzin, el-Hâc Ahmed b. Mahmud, eş-Şeyh İvaz Efendi, Şaban Efendi el-kâtib.