İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 429 Hüküm no: 460 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye olarak satılan aslında hür anne ve babanın kızı olan Meryem’in cariye olmadığını ispat etmesi İsbât-ı hürriyet. Mahmiye-i İstanbul’da Sinan Ağa mahallesinde sâkine Meryem bt. Ahmed nâm seyyib meclis-i şer‘-i hatîr-i lâzımü’t-tevkīrde rıkk olmak üzere kendiye vâzı‘u’l-yed olduğu şer‘an sâbit olan Hüseyin Bey b. Ebîbekir mahzarında üzerine da‘vâ edip ben fi’l-asl vilâyet-i Rumeli’nde Vidin kasabasında vâki‘ Brasik nâm mahallede sâkin Ahmed Sipâhi b. Abdullah nâm hürrü’l-aslın aslına asla rıkk târî olmayan zevcesi Hadîce bt. Abdurrahim nâm hürretü’l-asldan mütevellide olmuş sulbiye kızı olup hürretü’l-asl iken mezbûr Hüseyin Bey rıkk olmak üzere bana vaz‘-ı yed eder suâl olunup mezbûrun kasr-ı yedine tenbîh ile sebîlim tahliye olunmak taleb ederim dedikde gıbbe’s-suâl mezbûr Hüseyin Bey cevâbında ben mezbûre Meryem’i târih-i kitâbdan dört ay mukaddem ismi ma‘lûmum olmayan gāib ani’l-meclis esirciden Rusiyetü’l-asl câriye olmak üzere seksen riyâlî guruşa iştirâ ve kabz eyledim hâlâ mezbûrenin ber-minvâl-i muharrer hürretü’l-asl olduğu ma‘lûmum değildir deyü inkâr eyledikde mezbûre Meryem’den müdde‘âsı için beyyine taleb olundukda udûl-i Müslimînden olup kasaba-i mezbûre sükkânından mahmiye-i mezbûrede İbrahim Hanzâde sarayında müsâfiren sâkin Ali Bey b. Abdullah ve Havuzlu Hamam’da müsâfiren sâkin <> Ahmed Bey b. Mustafa Odabaşı nâm kimesneler li-ecli’ş-şehâde meclis-i şer‘de hâzırân olup gıbbe’l-istişhâd fi’l-vâki‘ mezbûre Meryem kasaba-i mezbûrede vâki‘ mahalle-i mezbûre Prasik’de sâkin Ahmed Sipâhi b. Abdullah nâm hürrü’l-aslın aslına asla rıkk târî olmayan zevcesi Hadîce bt. Abdurrahim nâm hürretü’l-asldan mütevellide olmuş sulbiye kızıdır. Biz bu husûsa bu vech üzer[e] şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mezbûre Meryem’in sebîli tahliye olunup mâ-vaka‘a bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mefharu’l-kuzât Hüseyin Efendi el-Burûsî, Mustafa Efendi el-kâtib, Ahmed Efendi el-kâtib, Abdi Çelebi b. Hüseyin, Mustafa Çelebi b. İsa.