İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 429 Hüküm no: 461 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Turgud ile Mehmed Beşe b. Hüseyin’in boşanmaları Muhâla‘a ma‘a ibrâ. Mahmiye-i İstanbul’da Yeniodalar’da Karaköse Kapısı kurbünde Öksüzce mahallesinde sâkine Âişe Hatun bt. Turgud meclis-i şer‘de zevci işbu râfi‘u’l-kitâb Mehmed Beşe b. Hüseyin mahzarında ikrâr ve takrîr-i kelâm edip mezbûr Mehmed Beşe benim zevcim olup zimmetinde mütekarrir ve ma‘kūdün-aleyh olan elli guruş mehr-i mü’eccelim ve nafaka-i iddet-i ma‘lûmem üzerlerine me’ûnet-i süknâm kendi üzerime olmak üzere ve külle yevm onar akçeden bir senede iddet-i mu‘ayyende müctemi‘ olan nafaka-i mefrûza-i müstedânem olan üç bin altı yüz akçe hakkım dahi bedel-i hul‘ olmak üzere zevcim mezbûr ile muhâla‘a-i sahîha-i şer‘iye ile muhâla‘a <> eyledikde ol dahi hul‘-ı mezbûru kabûl eyledikden sonra her birimiz âharın zimmetini hukūk-ı zevciyete ve gayra müte‘allika da‘âvîden ibrâ-i âmm ile ibrâ ve ıskāt eyledik dedikde mukırre-i mezbûreyi cemî‘ kelimâtında mezbûr Mehmed Beşe bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hızır Efendi b. Mustafa, Hasan Beşe b. Ömer el-mübâşir, Cafer Beşe b. Behram, Osman Beşe b. Mustafa, el-Hâc Mustafa el-Hasîrî, Hüseyin b. Abdulgafur, Mehmed Ağa b. Abdullah el-Eyyûbî, Süleyman b. Şahin Çavuş.