İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 432 Hüküm no: 465 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime bt. Receb’in Beyşehir’in Avşar köyünde bulunan ev ve bağçesini Fâtıma Hatun bt. Muharrem Bey’e sattığı Mübâya‘a Vilâyet-i Anadolu’da Beyşehir kazâsına tâbi‘ Avşar nâm karye sâkinlerinde olup hâlâ mahmiye-i İstanbul’da debbağ Sinan mahallesi sâkinlerinden Halime bt. Receb nâm hatun meclis-i şer‘-i hatîrde yine karye-i mezbûre sâkinlerinden râfi‘u’l-kitâb Fâtıma Hatun bt. Muharrem Bey tarafından ikrâr ve âti’l-beyânı tasdîke vekîl olup vekâleti bi-mâ hüve nehcü’s-sübût şer‘an sâbite olan kazâ-i mezbûr kethudâ yeri müvekkile-i mezbûrenin zevci Mehmed Ağa b. Mirza mahzarında ikrâr ve takrîr-i kelâm edip karye-i mezbûrede vâki‘ bir tarafı Müezzin Mehmed Halîfe mülkü ve üç tarafı arsa-i hâliye ile mahdûd iki bâb tahtânî ve iki bâb fevkānî odaları ve bir sofayı ve zât-ı eşcâr-ı müsmire ve gayrı müsmire bahçeyi müştemil mülk menzilimi ve yine karye-i mezbûre sınırı dâhilinde vâki‘ eşcâr-ı müsmire ve gayr-ı müsmireyi müştemil mülk bahçemi vekîl-i mezbûr Mehmed Ağa’ya safka-i vâhide ile bin beş yüz nakd-i râyic bi’l-vakt fıddî akçeye bey‘-ı bâtt-ı sahîh-i şer‘î ile bey‘ edip ol dahi müvekkile-i mezbûre için iştirâ ve kabûl eyledikden sonra semeni olan meblağ-ı mezbûr bin beş yüz akçeyi vekîl-i mezbûr Mehmed Ağa yedinden tamamen ahz u kabz eyledim. Mârrü’z-zikr menzil ve bahçeyi mahâllinde zabt ve tasarrufa müvekkile-i mezbûre Fâtıma’yı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem sene 1072. Şuhûdü’l-hâl: Süleyman b. el-cündî, Hasan Bey b. el-cündî, Arslan Bey b. Mustafa, Mehmed Bey b. Ahmed, Muharrem b. Hacı, Pîrî b. Abdullah, Ramazan Beşe b. Abdullah, Mustafa b. el-müezzin, Mustafa Çelebi b. İsa.