İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 432 Hüküm no: 464 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesli bt. Bekil’in varisi olduğunu iddia eden Yanaki v. Vasil’in bu iddiasının kabul edilmediği Mahmiye-i İstanbul’da Mirâhur mahallesinde mütemekkin Yanaki v. Vasil nâm zimmî meclis-i şer‘de mahalle-i mezbûrede mütemekkine iken bundan akdem hâlike olan Nesli bt. Bekil nâm Ermeninin sadriye kızı Ruşeş nâm Ermeniye tarafından da‘vâ-yı âtîye ve husûmet ve redd-i cevâba vekîl olup Kurd v. Yarmim ve Mekil v. Manuk nâm Ermeniler şehâdetleri ile şer‘an vekâleti sâbite olan zevci Kiryazi v. Yorgi mahzarında üzerine da‘vâ edip ben hâlike-i mezbûre Nesli’nin babası Bekil nâm Ermeninin li-ebeveyn er karındaşı Sart nâm Ermeninin sulbiye kızı Melek nâm Ermeniyenin sadrî oğlu verâseti iken müvekkile-i mezbûre Ruşeş sadriye kızı olmağla cümle muhallefâtını ahz u kabz eylemişdir suâl olunup hissemi alıvermek taleb ederim dedikde müdde‘î-yi mezbûr hâlike-i merkūmenin zî-rahm cihetinden vârisi olup ve müvekkile-i mezbûre Ruşeş sadriye kızı olmağla cümle metrûkâtını karzan ve redden mezbûre Ruşeş’e intikāl eylediği lede’ş-şer‘ zâhir olmağın suâl dahi tevcîh etmeyip mezbûr Yanaki bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâdis min-Şevvali’l-mükerrem li-sene isnâ ve seb‘în ve elf. Şuhûdü’l-hâl: Ahmed Efendi kâtib-i kassâm, Mustafa b. İsa, Mehmed b. Ramazan, Veli b. Mahmud, Mustafa b. Hasan.