İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 433 Hüküm no: 467 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hizmetçisi İsmail b. Abdullah’ın malını çaldığı iddiasıyla Dilaver Bey tarafından açılan davanın anlaşmayla sonuçlandığı İbrâ. Vilâyet-i Anadolu’da Yeniil kazâsına tâbi‘ Gürün nâm karye sükkânından Dilaver Bey b. Murad meclis-i şer‘de livâ-i Samsun’da Harim kazâsına tâbi‘ Hâsbahçe nâm karye sükkânından İsmail b. Abdullah nâm şâbb-ı emred mahzarında ikrâr ve i‘tirâf edip mezbûr İsmail sâbıkā hizmetkârım iken eşyâ-i memlûkemden beş yüz akçe kıymetli bir kumaş kaftan ve üç yüz akçe kıymetli bir berber makraması ve bir Enâm-ı şerîf ve mâlımdan yüz otuz guruş ve siyah kabzalı bir sîm hançerimi ahz u kabz ve firâr ve gaybet edip hâlâ zafer bulmağla eşyâ-i mezkûreyi bi-aynihâ mezkûrdan taleb ve da‘vâ etmekle beynimizde münâza‘ât-ı kesîre vâkı‘a olmuş idi. El-hâletü-hâzihî da‘vâ-yı meşrûhamdan mezkûr İsmail’i ibrâ-i âmm ile ibrâ edip ba‘de’l-yevm mezbûr kıbelinde vechen mine’l-vücûh ve sebeben mine’l-esbâb benim için bir akçe ve bir habbe hak ve alâka kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: es-Sâbıkūn.