İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 434 Hüküm no: 468 Orijinal metin no: [58a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Mahmud Çelebi’nin Kiryazi ve ortaklarında olan alacağını aldığı Mahmiye-i İstanbul’da Narlıkuyu kurbünde sâkin olup Keresteci tâifesinden Mehmed Çelebi b. Sefer nâm kimesne meclis-i şer‘de râfi‘u’l-kitâb Kiryazi v. İstati ve şerîkleri Anderuc ve Kıravo ve Kigo ve Nikola nâm zimmîler muvâcehesinde ikrâr ve takrîr-i kelâm edip bundan akdem mezbûrûnun zimmetinde yedinde müşterâ ve makbûz kereste bahâsından dört bin akçe hakkım vardır deyü da‘vâ ve taleb eyledikdiğimde beynimizde münâza‘ât-ı şedîde ve muhâsamât-ı ekîde vâkı‘a olmuş idi. El-hâletü-hâzihî beynimizde muslihûn ve Müslimûn tavassut edip mezbûrlar benim ile da‘vâ-yı mezkûremden bin iki yüz nakd râyic fi’l-vakt akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr bin iki yüz akçeyi yedlerinden tamamen ahz u kabz edip ziyâde da‘vâsından zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm husûs-ı mezbûra müte‘allika benden bizzât veyâ bi’l-vekâle da‘vâ sudûr ederse lede’l-hükkâmi’l-kirâm mesmû‘a ve makbûle olmasın dedikde mukırr-ı merkūm Mehmed Çelebi’nin ber-minvâl-i muharrer cârî ve sâdır olan ikrârını mezbûrûn Kiryazi ve Anderuc ve Kıravo ve Kigo ve Nikola bi’l-muvâcehe tasdîk ve bi’l-müşâhede tahkīk eylediklerinde mâ-vaka‘a bi’t-taleb ketb olundu. Fi’l-yevmi’s-sâdis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Arslan Çavuş b. Abdülmennan el-mübâşir, Yusuf Çavuş b. ( ) eş-şehîr bi Yıldırım, Mehmed Çelebi b. Abdullah, Baba Rasûl b. Rıdvan, Mustafa Çelebi b. Ahmed.