İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 438 Hüküm no: 474 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâyezid Beşe b. Mahmud’un Mustafa Ağa b. Receb’e arsa ve içindeki ev enkazını satması Mübâya‘a. Mahmiye-i İstanbul’da Zeyrek kurbünde Şeyh Süleyman mahallesinde sâkin el-Hâc Bâyezid Beşe b. Mahmud meclis-i şer‘de işbu sahibü’l-kitâb fahrü’l-akrân Mustafa Ağa b. Receb muvâcehesinde ikrâr ve takrîr-i kelâm edip mahalle-i mezkûrede vâki‘ bir tarafı merhûm Müfti Ali Çelebi Vakfı olan mu‘allimhâneye ve bir tarafı Mustafa Bey Vakfı’na ve bir tarafı Ferhad Paşa Vakfı olup Mahmud Çavuş tasarrufunda olan menzile ve bir tarafı tarîk-i âm ile mahdûd büyût-ı adîdeyi müştemil arsasının Medîne-i Münevvere Vakfı’na senede iki yüz akçe icâresi olup binâsı mülküm olan menzil bundan akdem harîk-i kebîrde muhterik olan ancak arsa-i mezbûrenin etrâf-ı erba‘asında vâki‘ taş duvarı ve içinde mevcûd mülküm olan enkāzı merkūm Mustafa Ağa’ya on yedi bin fıddî râyic-i fi’l-vakt akçeye bâtten bey‘ ve teslîm ol dahi iştirâ ve tesellüm ve kabûl eyledikden sonra arsa-i mezbûreyi dahi yirmi beş bin akçeye ma‘rifet-i mütevellî ile ferâğ ve tefvîz ol dahi tefevvüz ve kabûl eyledikden sonra semen-i mezbûr on yedi bin akçe ile bedel-i merkūm yirmi beş bin akçe ki cem‘an kırk iki bin akçemi mezkûr Mustafa Ağa yedinden tamamen ahz u kabz eyledim. Ba‘de’l-yevm zikri mürûr eden taş duvarı ve enkāzı mülkü ve arsası hakk-ı makbûzudur, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Çavuş b. ( ), Mustafa Odabaşı b. Mahmud, Mustafa b. Mehmed el-kâtib, Abdullah Beşe er-râcil, Mustafa b. Mehmed, Yusuf Bey b. Yusuf, Mustafa Çelebi b. Nasuh, Mehmed Halîfe b. İbrahim.