İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 440 Hüküm no: 477 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pîrî Çelebi ile Zarife Hatun bt. Abdullah Efendi’nin sulhen boşanmaları İbrâ. Fi’l-asl vilâyet-i Anadolu’da Onikidîvân kazâsına tâbi‘ Saziye nâm karye sâkinelerinden olup hâlâ mahmiye-i İstanbul’da müsâfireten Zeyrek mahallesinde sâkine Zarife Hatun bt. Abdullah Efendi meclis-i şer‘de zevci işbu râfi‘u’l-kitâb Pîrî Çelebi b. Selim mahzarında bi-tav‘ihâ ikrâr ve takrîr-i kelâm edip merkūm Pîrî Çelebi târihü’l-kitâbdan sekiz ay mukaddem sâkin olduğumuz karye-i mezbûra Saziye’den İstanbul’a gelmek murâd eyledikde eğer üç aya değin ve yâhûd mektûb ile harçlık göndermez isem benden mutallaka ol deyü şart ve ta‘lîk ve sekiz aydan beri gelmeyip ve mektûb ile harçlık dahi göndermemekle ben dahi mezbûrdan mutallaka olmuş idim. Zimmetinde mütekarrir ve ma‘kūdun-aleyh olan on iki bin akçe mehr-i mü’eccelem ve nafaka-i iddet-i ma‘lûmem ve me’ûnet-i süknâmı ve bin altmış sekiz Muharremi’nde kazâ-i mezbûr kādısına merkūm Pîrî Çelebi üzerine takdîr ettirdiğim yevmî yirmi beşer akçe nafakadan târih-i kitâba gelince müctemi‘ olan ayda cem‘an kırk iki bin yedi yüz elli akçeyi merkūm Pîrî Çelebi’den taleb ve da‘vâ eylediğimde ol dahi inkâr etmeğin beynimizde münâza‘ât-ı kesîre vâkı‘a olmuşdur el-hâletü hâzihî beynimize muslihûn tavassut edip da‘vâ-yı mezbûrdan beni üç bin nakd-i râyic fi’l-vakt akçeye sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçeyi mezkûr Pîrî Çelebi yedinden bi’t-tamam ahz u kabz eyledikden sonra zevciyete ve gayrıya müte‘allika âmme-i da‘vâdan her birimiz âharın zimmetini ibrâ-i âmm [ve] kātı‘u’n-nizâ‘ ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-şehri Şevval-i mükerrem li-sene isneyn ve seb‘în ve elf. Şuhûdü’l-hâl: Musa Efendi b. Mehmed, es-Seyyid Hacı Mehmed b. Seyyid Hamid, Musa Efendi el-kādî, Bayram Beşe b. Şükrullah, Hüseyin Beşe b. Oruc, Receb Beşe el-mübâşir, Ali Beşe b. Mustafa.