İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 441 Hüküm no: 478 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi b. Ahmed’in Adalızâde Ahmed Efendi’deki alacağına kefil olan Hasan Efendi b. İbrahim’e borcu ödemesi için tenbihde bulunulması İkrâr-ı kefâlet. Mahmiye-i İstanbul’da Yarhisar mahallesinde sâkin bundan akdem vefât eden merhûm Halil Efendi b. Ahmed’in zevce-i metrûkesi olup kendinden sonra vefât eden Âişe Hatun’un hasran vârisi olan babası umdetü’l-emâcid ve’l-a‘yân Receb Ağa b. Ali tarafından husûs-ı câ’i’z-zikre vekîl olup vekâleti Ahmed Efendi b. Ramazan ve Mehmed Efendi b. ( ) el-imâm şehâdetleri ile şer‘an vekâleti sâbite olan Hasan Efendi b. İbrahim mahzarında bi’l-vekâle üzerlerine da‘vâ ve takrîr-i kelâm edip bundan akdem Yeniil kādısı iken vefât eden Adalızâde Ahmed Efendi zimmetinde müteveffâ-i mezbûr Halil Efendi’nin iki yüz doksan riyâlî guruş hakkı olup meblağ-ı mezbûrun cümlesine mezbûr Hasan Efendi emr ve kabûlü hâviye kefâletle kefîl oldukdan sonra kable’l-ahz mezbûr Halil Efendi vefât edip ba‘dehû vefât meblağ-ı mezbûr zevce-i metrûkesi mezbûr Âişe Hatun’un mehr-i mü’ecceli için ta‘yîn olundukdan sonra ol dahi vefât edip verâseti babası müvekkil-i mûmâ-ileyhe münhasıra olmağla meblağ-ı mezbûru kefâleti hasebiyle mezbûr Hasan Efendi’den müvekkilim için taleb ederim suâl olunsun dedikde gıbbe’s-suâl mezbûr Hasan Efendi cevâbında fi’l-vâki‘ mezbûr Halil Efendi’nin Adalızâde Ahmed Efendi zimmetinde olan iki yüz doksan riyâlî guruşu emr ve kabûlü hâviye kefâlet-i sahîha-i şer‘iye ile kefîl oldum deyü bi-tav‘ihiikrâr eylemeğin alâ-mûceb-i ikrârihî min-ciheti’l-kefâle zimmetine lâzım gelen iki yüz doksan riyâlî guruşu müvekkilim mûmâ-ileyhe edâ ve teslîm merkūm Hasan Efendi’ye tenbîh birle mâ-vaka‘a bi’t-taleb ketb olundu. Fi’s-sânî min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Şaban Efendi b. Halil el-imâm, Ömer Çavuş b. Zülfikar el-mübâşir, Hasan Çelebi b. Halil, Abdi Çelebi b. Hüseyin, Mustafa b. Mehmed, Ahmed b. Abdülcabbar.