İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 450 Hüküm no: 493 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mehmed’in vasîsi olan Mustafa b. Nahus’un Köse Hüseyin Bey b. Mehmed ile olan davasını delillendiremediği Yemîn bilâ-beyyine mu‘ârazadan men‘. Vilâyet-i Anadolu’da Pazarsuyu kazâsı muzâfâtından Çukurköy’de sâkin olup bundan akdem fevt olan Mehmed b. Himmet’in sulbî sagīr oğlu ve hasran vârisi Mehmed’in ammi[si] olup kıbel-i şer‘den mansûb vasîsi olduğunu iddi‘â eden Mustafa b. Nasuh meclis-i şer’de erbâb-ı tımardan Köse Hüseyin Bey b. Mehmed mahzarında sahib-i arz muvâcehesinde üzerine da‘vâ edip mezbûr Hüseyin Bey karye-i mezbûre toprağında vâki‘ lede’l-ahâlî ma‘lûmü’l-hudûd müteveffâ-i mezbûr Mehmed’in tapu ile tasarrufunda olup ba‘dehû vefâtihî âdiyyen mezbûr Ali’ye intikāl eden Tekecik ve Toraman ve Umkaya demekle ma‘rûf tarlaları beş sene mukaddem târih-i kitâba dek zabt ve zirâ‘at ve mahsūlünü kabz etmiş idi hâlâ ol tarlalar ile tasarruf eylediği müddet-i mezbûrenin ecr-i mislini mezbûr Hüseyin Bey’den taleb ederim suâl olunsun dedikde gıbbe’s-suâl mezbûr Hüseyin Bey cevâbında mârrü’z-zikr tarlaları ber-vech-i muharrer zabt ve zirâ‘at eylediği mezbûr Mustafa’nın vesâyetini inkâr eyledikde müdde‘î-i mezbârun müdde‘âsı için beyyine taleb olundukda udûl-ı Müslimînden tımar sipâhisi Abdi Bey ve Receb Beşe b. Himmet ve Ahmed Beşe b. Hasan nâm kimesneler li-ecli’ş-şehâde meclis-i şer‘de hâzırûn olup istişhâd olunduklarında fi’l-vâki‘ mezbûr Mustafa sagīr-i mezbûr Ali’nin ber-minvâl-ı muharrer vasîsi olup mezbûr Hüseyin Bey sagīr-i mezbûru babası müteveffâ-i mezbûr Mehmed’den müntakil olup zikr-i mürûr eden tarlalarını beşer sene huzûrumuzda zabteyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘dehû ri‘âyet-i şerâ’iti’l-kabûl şehâdetleri makbûle olmağın ol tarlalardan kasr-ı yedine mezbûr Hüseyin Bey’e ba‘de’t-tenbîh ber-vech-i muharrer zirâ‘ati için müdde‘î-i mezbûrdan sâniyen beyyine taleb olundukda ikāmet-i beyyineye kādir olmamağla ber-vech-i âtî istihlâf eyledikde mezbûr Hüseyin Bey ol tarlaları kendi veyâ vekîli zirâ‘at eylemediğine ba‘de’t-tahlîf yemîn billâhi’l-a‘lâ eyledikden sonra müdde‘î-i mezbûr vasî Mustafa bilâ-beyyine mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Çeşmî Mehmed Çavuş İstanbul’da subaşı hâlâ, Hüseyin Çavuş el-mübâşir, Hüseyin Efendi b. Sarı Fazıl, Aykud oğlu Mehmed Beşe, Abdülkerim Ağa, Murtaza Bey b. Ârif Ahmed, Osman Çelebi b. İbrahim Efendi, Receb b. Hasan, Murad b. Ahmed Efendi, Mehmed Efendi b. Haydar, Yahya Beşe er-râcil