İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 449 Hüküm no: 492 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Abdullah Efendi’ye ait emlakın mirasçıları tarafından Ahmed Ağa b. Abdülmennan’a satışı Mübâya‘a-i menzil meblağ beş yük altmış bin. Dârü’l-hilâfeti’l-aliyye Kostantıniyye el-mahmiyede Koca Mustafapaşa kurbünde Canbaziye mahallesinde sâkin iken bundan akdem fevt olan Sarı Abdullah Efendi’nin verâseti zevceteyn-i metrûketeyni Fâtıma [bt.] Halil’e ve Seher bt. Abdullah’a ve sulbî kebîr oğlu Mahmud Çelebi’ye ve sulbiye kebîre kızları Hadîce ve Aliye’ye münhasıra olduğu şer‘an müte‘ayyin ve tashîh-i meseleleri otuz iki sehmden olup sihâm-ı mezbûrenin ikişer sehmi mezbû[re]tân Fâtıma ve Seher’den her birine ve on dört sehmi mezbûr Mahmud Çelebi’ye ve yedişer sehmi mezbûretân Hadîce ve Aliye’den her birine isâbet eylediği bâhir ve mübeyyin oldukdan sonra mezbûr Mahmud Çelebi asâleten ve mezbûretân Fâtıma ve Hadîce taraflarından husûs-ı âti’z-zikre değin vekîl olup mezbûrenin zâtını ma‘rifet-i şer‘ ile ârifân Siyavuş Bey b. Abdullah ve Osman b. Ahmed şehâdetleri ile şer‘an vekâleti sâbit olan La‘lîzâde Şeyh Efendi b. İbrahim vekâleten ve mezbû[re]tân Seher ve Aliye taraflarından kezâlik husûs-ı âti’z-zikre vekîl olup mezbû[re]tânın zâtını ma‘rifet-i şer‘iye ile ârifân olan şâhidân-ı mezbûrân şehâdetleri ile vekâleti sâbite olan Abdurrahman Çelebi b. Ahmed vekâleten meclis-i şer‘de işbu kitâbın sahibi umdetü’l-emâsil ve’l-a‘yân makbûlü’s-sudûr ve’l-erkân Ahmed Ağa b. Abdülmennan mahzarında her biri ikrâr-ı sahîh-i şer‘î ve i‘tirâf-ı sarîh-i mer‘î kılıp mahalle-i mezbûrda vâki‘ iki tarafı ba‘zan tarîk-i âmma ve ba‘zan Mustafa Paşa Vakfı’na ve ba‘zan Dellâk Mustafa mülküne ve bir tarafı ba‘zan tarîk-i âmma ve ba‘zan Mustafa Paşa Vakfı’na ve ba‘zan Mustafa Efendi mülküne ve ba‘zan Veli Bey mülküne ve bir tarafı Canbaziye imâmına meşrûta menzile müntehî iki bâb fevkānî oda ve bir kilâr ve bir sofa ve tahtânî bir oda ve zât-ı eşcâr-ı müsmire ve gayr-ı müsmire bahçe ve bahçe içinde iki oda ve bir sofa ve bir köşk ve kapı yanında iki oda ve iki sofa ve bir köşk ve bir matbah ve altı bi’r-i mâ ve bir sagīr maslak ve iki kenîf ve üç sokak kapısını müştemil menzil müteveffâ-i mezbûr Abdullah Efendi’nin ile’l-vefât mülkü olup ba‘de vefâtihî veresesine intikāl etmeğin hâlâ menzil-i mahdûd-ı mezbûr cemî‘ tevâbi‘i ve levâhıkı ile merkūm Ahmed Ağa’ya her birimiz asâleten ve vekâleten bey‘-ı bâtt-ı sahîh-i şer‘î ile beş yük altmış bin akçeye bey‘ ve teslîm ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûr beş [yük] altmış bin akçeyi merkūm Ahmed Ağa yedinden asâleten ve vekâleten bi’t-tamam ve’l-kemâl ahz u kabz eyledik ba‘de’l-yevm menzil-i mahdûd-ı mesfûr merkūm Ahmed Ağa’nın mülk-i müşterâsı ve hakk-ı sırfıdır keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Umdetü’l-kuzât Lalizâde Mustafa Efendi b. İbrahim Efendi, umdetü erbâbü’t-tahrîr ve’l-kalem Abdülaziz Efendi, Abdülbaki Efendi b. Şeyh Hasan Efendi b. Mehmed, el-Hâc Mustafa b. Abdullah, Mustafa b. Ebûbekir, Mehmed Efendi b. Ahmed el-imâm, Abdurrahman Efendi el-imâm, Ramazan Ağa b. Hüseyin, İbrahim Bey b. Mehmed, Mehmed Efendi b. Abdullah, Mehmed Efendi.