İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 452 Hüküm no: 495 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun bt. Mehmed’in kocası Osman Beşe b. Kurt ile muhâlaa yoluyla boşandığı Hul‘ ve tarafeyn ibrâ. Mahmiye-i İstanbul’da Sancakdâr Hayreddin mahallesinde sâkine Havva Hatun tarafından husûs-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân olan Hasan b. Mehmed ve el-Hâc Mustafa b. Mehmed şehâdetleri ile vekâleti sâbite olan Mehmed b. Müstecâb nâm kimesne meclis-i şer‘de dâmadı Osman Beşe b. Kurt nâm râcil mahzarında bi’l-vekâle ikrâr ve takrîr-i kelâm edip kızım ve müvekkilem mezbûre Havva’nın zevci mezbûr Osman Beşe zimmetinde mütekarrir ve ma‘kūdun-aleyh olan altı bin beş yüz akçe mehr-i mü’eccel ve nafaka-i iddet-i ma‘lûmesi üzerlerine ve me’ûnet-i süknâsı dahi müvekkilemin üzerine olmak üzere ve mezbûrun firâşından hâsıla sagīre kızım Fâtıma’yı hakk-ı hıdâne sâkıt olunca kendi mâlından infâk ve iksâ etmek üzere ve mezbûr Osman Beşe’ye def‘ eylediğim bin akçe dahi bedel-i hul‘ olmak üzere mezbûr Osman Beşe ile muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru kabûl eyledikden sonra hukūk-ı zevciyete müte‘allika cemî‘ de‘âvîden bi’l-vekâle mezbûr Osman Beşe’nin zimmetini ibrâ ve ıskāt edip ol dahi hukūk-ı zevciyete müte‘allika cemî‘ de‘âvîden kızım ve müvekkilemin zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Çelebi b. Yusuf, Hamza Efendi b. Ahmed el-müderris, Tarancıyan? Mustafa Ağa, Hüseyin Çelebi b. Ebûbekir, Ahmed b. Yusuf, Hasan b. Mahmud, Hüseyin Çelebi b. Mahmud.