İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 452 Hüküm no: 496 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrunnisa Hatun bt. Abdurrahman Efendi’nin Rus asıllı cariyesi Nâil bt. Abdullah’ı azat ettiği Itâknâme. Mahmiye-i İstanbul’da ( ) mahallesinde sâkine fahrü’l-muhadderât zahru’l-muvakkarât Hayrunnisa Hatun bt. Abdurrahman Efendi tarafından i‘tâk-ı câ’i’z-zikri ikrâra vekîl olup zât-ı müşârün-ileyhâyı ma‘rifeti’ş-şer‘iye ile ârifân olan Abdülkerim Çelebi b. ( ) ve Mehmed Çelebi şehâdetleri ile sâbit olan iftihârü’l-müderrisîni’l-kirâm zübdetü’l-muhakkıkīn-i fihâm zevc-i mükerremleri Abdurrahim Efendi b. el-merhûm Yahya Efendi meclis-i şer‘de bi’l-vekâle ikrâr ve takrîr-i kelâm edip müvekkilem müşârün-ileyhâ rıkkını kendiye mu‘terife olan gök gözlü, kıvrık burunlu, ak saçlı Rusiyyetü’l-asl Nâil bt. Abdullah nâm memlûke câriyesini niyet-i hâlisa-i vâfiye ve taviyyet-i tayyibe-i sâfiyye ile hasbeten lillâhi’l-aliyyü’l-azîm ve taleben li-merzâti’r-rabbi’r-rahîm mâlından azat ve mülkümden ihrâc ve silk-i harâ’ir-i asliyâta ilhâk ve idrâc eyledim. Min-ba‘d câriye-i mezbûre-i mevsûfe sâir harâ’ir-i asliyât gibi hürre olup üzerinde velâdan gayrı hakkım kalmadı dedi dedikde mâ-vaka‘a bi’t-taleb ketb olundu. Fi’l-yevmi’l-aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Şeyh Mehmed Efendi b. Abdurrahman Efendi, Hasan Çelebi b. Halil el-mukayyid, İslâm Efendi b. İbrahim, Mahmud Efendi b. İbrahim el-kādî, Ali Ağa b. Oruc, Ali Çelebi b. Mehmed, Osman Beşe b. Şaban, Hüseyin Efendi el-Burûsî, Şaban b. Mehmed, Mustafa b. Memi.