İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 466 Hüküm no: 517 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice b. Mehmed ile Avram v. Martoros arasındaki alacak davasında sulh oldukları Sulh. Mahmiye-i İstanbul’da Veled-i Karabaş mahallesinde sâkin iken bundan akdem vefât eden Şaban Bey b. Abdülhalim’in zevce-i metrûkesi Hadîce bt. Mehmed nâm kimesne meclis-i şer‘de işbu hâmilü’s-sifr Avram v. Martoros nâm zimmî muvâcehesinde ikrâr ve takrîr-i kelâm edip zevcim müteveffâ-i mezbûrun <> zimmî-i merkūm zimmetinde bogāsı semeninden on bin akçe hakkı olmağla meblağ-ı mezbûr müteveffâ-i mezbûrun zimmetinde mütekarrir ve ma‘kūdun-aleyh on bin akçe mehrim mukābelesinde bana ta‘yîn ve tahsîs olundukda meblağ-ı mezbûru zimmî-i merkūmdan taleb eylediğimde ol dahi inkâr etmekle beynimizde münâza‘ât-ı kesîre câriye olmuş idi, el-hâletü hâzihî vesâtet-i muslihîn ile zimmî-i merkūm da‘vâ-yı mezkûreden benimle beş bin akçe üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel-i sulh olan beş bin akçeyi merkūm zimmînin yedinden tamamen ahz u kabz ve ibrâ eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ahmed Ağa b. Mehmed Ağa, Mehmed Ağa b. Abdullah, Süleyman Çelebi b. İbrahim, Halil Çavuş b. ( ), Uzun Ahmed b. ( ), Abdi Çelebi b. Hüseyin, Veli b. Mahmud, Mehmed b. Ramazan.