İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 465 Hüküm no: 516 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri v. Kosta’nın Papas oğlu Yanaki’ye olan borcunu kabul ettiği İkrâr-ı deyn. Mahmiye-i İstanbul’da Meydân kurbünde sâkin bakkāl tâifesinden Dimitri v. Kosta nâm zimmî meclis-i şer‘de işbu bâ‘isü’s-sifr Yorgi v. Dimo nâm zimmî muvâcehesinde ikrâr ve takrîr-i kelâm edip tâife-i mezbûreden olup gāib ani’l-meclis Papas oğlu Yanaki nâm zimmîye cihet-i karz-ı şer‘îden yirmi dört bin akçe deynim olup mezbûr Yorgi meblağ-ı mezbûra benim emrim ile kefâlet-i sahîha-i şer‘iye ile kefîl oldukdan sonra kefâleti hasebiyle meblağ-ı mezbûru merkūm Yanaki’ye edâ ve îfâ ettiğimden mâ‘adâ tasarrufunda olan lede’l-cîran ma‘lûmü’l-hudûd bakkāl dükkânında olup beynimizde adedi ma‘lûm iştirâ eylediğim avadanlık semeninden dahi üç bin akçe ki cem‘an yirmi yedi bin akçe deynim olup meblağ-ı mezbûrdan on sekiz bin akçesin nakd, dört bin akçeye mukaddem bir kazgan ve beş küp iki fener ve terâzi ve sâir dükkân âlâtı ki cem‘an yirmi iki bin akçesin merkūm Yorgi’ye vaz‘ ve teslîm edip meblağ [-ı mezbûrdan] bâkī beş bin akçe zimmetimde lâzımü’l-edâ ve vâcibü’l-kazâ mezbûr Yorgi’ye deynimdir deyü tav‘an ikrâr ve i‘tirâf eylemeğin gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: İstador v. Marat, Miço v. Kiryazi, Anderyod v. Andoy?, Visar v. Andon, Nikola v. Yorgi, İsteryot v. Todori, Yoludepede? v. Mihal.