İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 468 Hüküm no: 521 Orijinal metin no: [64a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan b. Abdullah’tan oğlu Mehmed’e intikal eden vakıf arsasının müzayede ile başkasına satışına izin verildiği Mahmiye-i İstanbul’da Emin Sinan mahallesinde sâkin iken bundan akdem fevt olan Rıdvan b. Abdullah’ın sulbî sagīr oğlu Mehmed’in kıbel-i şer‘den mansûb vasîyy-i şer‘îsi olan kız karındaşı Neslihan meclis-i şer‘de merkūm Görenci el-Hâc Mustafa Vakfı’na hâlâ mütevellî olan Ali Efendi bin Abdullah mahzarında takrîr-i kelâm edip mahalle-i mezbûrda vâki‘ bir tarafı Hasan Beşe mülkü ve bir tarafı Beşir Ağa mülkü ve bir tarafı İskender Ağa mülkü ve bir tarafı tarîk-i âm ile mahdûd bir bâb tahtânî oda icâre-i mu‘accele ve beher ay doksan akçe icâre-i müeccele ile sagīr-i mezbûrun tasarrufunda iken harîk-i azîmde muhterik olup arsa-i sırfa kalmışdır. Zikr olunan arsanın icâre-i müeccelesi ziyâde olup sagīr-i mezbûrun imâret ve meremmetine iktidârı olmadığından gayrı nafaka ve kisveye eşedd-i ihtiyâcla muhtâc olmağın sâlifü’z-zikr odanın arsası ba‘de’l-müzâyede izn-i mütevellî ile âhara tefvîz olunması için kıbel-i şer‘den izin taleb ettirdik dedikde fi’l-vâki‘ hâl minvâl-ı muharrer üzere olup zikrolunan oda arsasının icâre-i müeccelesi ziyâde olup sagīr-i mezbûr dahi [64b] imâret ve meremmete iktidârı olmadığından gayrı nafaka ve kisveye eşedd-i ihtiyâcla muhtâc olduğunu sikātdan cemm-i gafîr haber vermeğin arsa-i mezbûreyi âhara ferâğ ve tefvîze vasîyy-i mezbûr Neslihan’a kıbel-i şer‘den izin verilip mâ hüve’l-vâki‘ bi’t-taleb ketb olundu. Fi’l-yevmi’l-a‘şir min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ali Çelebi b. Muharrem, Osman Bey ser-bölük, Abdi Çelebi b. Hüseyin, Veli b. Mahmud.