İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 469 Hüküm no: 522 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pir Ali bin Allahverdi ile Hasan Ağa b. Ahmed arasındaki alacak davasının sulh yoluyla halledildiği Sulh, ibrâ. Vilâyet-i Anadolu’da Suğla kazâsı muzâfâtından Sahra nâhiyesine tâbi‘ Beşkeser nâm karyede Pir Ali bin Allahverdi meclis-i şer‘de işbu bâ‘isü’r-rakīm Hasan Ağa b. Ahmed mahzarında ikrâr ve i‘tirâf edip mukaddemâ mezbûr Hasan Ağa kazâ-i mezbûrda voyvoda iken yüz guruş kıymetli bir re’s al kısrağımı bi-gayr-ı hakkın ahz u kabz etmekle mezbûrdan kıymetini da‘vâ ve taleb eylediğimde beynimizde münâza‘ât-i kesîre cereyân etmiş idi, el-hâletü hâzihî tavassut-ı muslihîn ile da‘vâ-yı mezbûreden merkūm Hasan Ağa benimle üç bin akçe üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçeyi mezbûr Hasan Ağa yedinden bi’t-tamam ahz u kabz edip mâ‘adâ da‘vâsından mezbûr Hasan Ağa’nın zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Emrullah Ağa b. Mahmud, Abdullah Çelebi b. ( ), Şaban b. Ahmed, Mehmed Bey b. ( ), Hasan Efendi b. Mehmed, Mehmed el-müezzin, Hasan Efendi b. ( ), Mahmud Çelebi b. Ahmed.