İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 477 Hüküm no: 533 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktul Mimarbaşı Mustafa Ağa’nın kölesi Macar asıllı Cafer b. Abdullah’ın hür olduğu Itâknâme-i maktûl mi‘mârbaşı. Husûs-ı âti’l-beyânın mahâllinde istimâ‘ [ve] tahrîri iltimâs olunmağın kıbel-i savb-ı şer‘den Mevlânâ Mustafa Efendi b. Ahmed irsâl olunup ol dahi hâlâ Atebe-i aliyye-i sultanîde lâ-zâlet meşhûnetihî bi’l-inâyeti’s-Subhâniye’de şıkk-ı evvel defterdârı olan el-cenâbü’l-âlî makarru’l-mefâhirü ve’l-meâli sahibü’l-câhi’l-menî‘ sahibü ezyâli’l-mecdi’r-refî‘ âkidü me‘âkidi’d-devletü’ş-şâmiha kā‘idü mekâ‘idi’l-izzi’r-râsiha el-mahfûfu bi-inâyeti’l-meliki’l-ganî a‘ni-bih Ahmed Efendi edâmallâhu ıkbâlehu hazretlerinin mahmiye-i Kostantıniyye’de Vefa meydânı kurbünde vâki‘ menzil-i âlîlerine varıp zeyl-i rakīmde esâmîleri mastûr Müslimîn-i huzûrunda akd-i meclis-i şer‘-i kadîm eyledikde mahmiye-i mezbûrede Ayasofya-i kebîr kurbünde Hayreddinbey mahallesinde sâkin iken magzûben katl olunan Mi‘mârbaşı Mustafa Ağa’nın menzilinde sâkine uzun boylu, açık sarı kaşlı, elâ gözlü Macariyyü’l-asl Cafer b. Abdullah tarafından husûs-ı câ’i’z-zikre vekîl olan Mehmed Efendi b. Ahmed ve Mustafa b. Abdullah şehâdetleri ile şer‘an vekâleti sâbite olan Hanefî Çelebi b. Ali meclis-i mezbûrda maktûl-i mezbûrun bâ-fermân-ı âlî cümle metrûkâtını cânib-i mîrî için zabteden müşârün-ileyh efendi hazretleri huzûrunda bi’l-vekâle üzerine da‘vâ edip müvekkilim mezbûr Cafer maktûl-i mezbûrun abd-i memlûkü olup katl olunmazdan bir gün mukaddem Çavuşbaşı habsinde iken mezbûr Mustafa Ağa müvekkilim gulâm-ı mevsûf-ı mezkûru hasbeten lillâhi’l-hallâk tahrîr ve i‘tâk ve silk-i ahrâr-ı asliyyîne idrâc ve ilhâk edip hür olmuş iken rık olmak üzere müşârün-ileyh efendi mezbûra vaz‘-ı yed eylemişdir. Suâl olunup sebîli tahliye olunmak matlûbumdur dedikde gıbbe’s-suâl müşârün-ileyh efendi hazretleri cevâbında gulâm-ı mezbûr[u] vaz‘-ı yed eylediğin ikrâr lâkin ber-minvâl-ı muharrer ıtkını inkâr edicek vekîl-i mezbûrdan müdde‘âsını mübeyyin beyyine taleb olundukda udûl-ı ahrâr-ı ricâl-i Müslimînden olup mahalle-i mezbûr sükkânından Hüseyin Efendi b. eş-Şeyh Halil ve Receb Efendi b. Mehmed ve Cafer b. Ali nâm kimesneler li-ecli’ş-şehâde meclis-i şer‘de hâzırûn olup istişhâd olunduklarında fi’l-vâki‘ mi‘mârbaşı Mustafa Ağa katl olunmazdan bir gün mukaddem Çavuşbaşı habsinde iken abd-i memlûkü mezbûr Cafer’i hasbeten lillâhi’l-hallâk tahrîr ve i‘tâk ve silk-i ahrâr-ı asliyyîne idrâc ve ilhâk eyledim dedi biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde gıbbe ri‘âyet-i şerâ’iti’l-kabûl şehâdetleri makbûle olduğun mevlânâ-yı mezbûr mahâllinde istimâ‘ ve tahrîr ve şehâdet-i mezbûr mûcebince mezbûr Cafer’in ıtkına hükmeyledikden sonra meclis-i şer‘de alâ-vukū‘ihî inhâ ve takrîr etmeğin mevlânâ-yı mezbûrun hükmü tenfîz olunup mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Umdetü’l-emâcid ve’l-ekârim Cebecibaşı Ali Ağa Mehmed Efendi b. Ahmed, Abdülkadir Ağa b. Ali el-cündî, Süleyman Efendi el-imâm, Mehmed Halîfe el-müezzin, Abdurrahman b. Mirza, Osman Çavuş b. ( ), Hacı Yusuf b. Abdullah, Osman b. Ali, Mustafa b. Abdülmuttalib, ve gayruhum.