İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 477 Hüküm no: 532 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un Selanik’teki evinin satışı için kardeşi Mehmed Çelebi b. Yusuf’u vekil tayin ettiği Vekâlet. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Nahılbend mahallesi sâkinlerinden yine mahalle-i mezbûr sâkinlerinden Yakub Bey b. İbrahim ve Mustafa b. Hüseyin ta‘rîfleriyle mu‘arrefe olan Emine bt. Mehmed Ağa nâm hatunun sâkine olduğu menziline varıp zeyl-i kitâbda mastûrü’l-esâmî olan Müslimîn huzûrunda akd-i meclis-i şer‘-i şerîf eyledikde mezbûre Emine Hatun meclis-i ma‘kūd-ı mezbûrda er karındaşı işbu râfi‘u’l-kitâb Mehmed Çelebi b. Yusuf mahzarında takrîr-i kelâm edip vilâyet-i Rumeli’nde mahrûse-i Selanik mahallât-ı mahallesinden Câmi‘-i Atîk mahallesinde vâki‘ bir tarafı ba‘zan Mehmed ve ba‘zan ( ) nâm zimmî mülkleri ve bir tarafı meydân ve bir iki tarafı tarîk-i âm ile mahdûd dâhiliye ve hâriciye büyût-ı adîdeyi müştemil mülk menzilimi cemî‘ tevâbi‘i ve levâhıkı ile bey‘ ve semenini kabza ve bana îsâle ve kabz ve îsâl mütevakkıf olduğu umûrun cümlesine karındaşım mezbûr Mehmed Çelebi’yi tarafımdan vekîl eyledim dedikde ol dahi vekâlet-i mezbûreyi kabûl ve hizmet-i lâzımesin edâya müte‘ahhid olduğunu mevlânâ-yı mezbûr mahâllinde tahrîr ba‘dehû ma‘an ba‘s olunan Ahmed b. Abdülcabbar ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ali Bey b. Ahmed, Sefer Bey b. Davud, İbrahim Beşe b. Hasan, Mehmed Bey b. Abdullah.