İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 492 Hüküm no: 559 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahalinin şikayeti üzerine İstanbul’un Samatya Kapısı civarındaki Hâcce Kadın mahallesinde yapılan genel teftiş Mahmiye-i İstanbul’da Samatya Kapısı kurbünde Hâcce Kadın mahallesinde sâkin fahrü’l-akrân Konakçı Hasan Ağa b. Ali meclis-i şer‘de takrîr-i kelâm edip mahalle-i mezbûrede vâki‘ menzilimin dâhilinde makarr-ı nisâ olan mevâzi‘-ı müte‘addideye câr-ı mülâsıklarım olan zimmî tâifesinin menâzillerinin havâleleri olup ve mahallemiz fi’l-asl Müslim mahallesi iken bundan akdem sahiblerinin tama‘-ı hâmları sebebi ile ziyâde bahâ ile menzillerin kefere tâifesine bey‘ etmeleri ile mahallemizde zimmî tâifesi çok olmağla eşkıyâ müstevlî olup gece ve gündüz çeng ve çagana ve zurna ve nakkāre ile şurb-i hamur ve i‘lân-ı fısk ve fücûr etmeleri ile sît [u] sadâlarından câmi‘-i şerîfde edâ-i salât ederken mahalle-i mezbûre ahâlîsinin namazlarına fesâd ârız olduğundan mâ‘adâ her biri kendi menzilleri içinde Kur’ân-ı Azîmü’ş-şân kırâet ve ibâdet edemeyip cümlemiz zimmî tâifesinden müte’ezzîleriz ve bundan akdem gece ile menzilim içine harâmî girip habîr olduğumda firâr etmeğin ahvâlimi der-i ma‘delet-mekîne i‘lâm eylediğimde fazîletlü İstanbul efendisi hazretleri mahalle-i mezbûreyi yoklayıp keşf ve hüccet edip eşkıyâlar var ise ve anda olan Müslümânlar evlerine zararları var ise huzûruma arz ve i‘lâm oluna deyü yedime buyruldu-i şerîf verilmişdir deyü takrîrine muvâfık buyruldu-i şerîf ibrâz eyledikde imtisâlen leh cânib-i şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da hâlâ Subaşı olan Mehmed Çavuş b. Ahmed ve Asesbaşı Ahmed Ağa b. Ali ile mahalle-i mezbûreye varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde mezbûr Hasan Ağa’nın câr-ı mülâsıkı olup âhar diyârda olan Çorbacı Mehmed Ağa’nın karındaşı ve vekîli olan Mustafa Beşe b. Abdullah mahzarında mezbûr Mehmed Ağa’nın menzilinin mûmâ-ileyh Hasan Ağa’nın menzili dâhiline havâlesi olmağın Mehmed Ağa’nın menziline girip nazar olundukda menzil-i mezbûrda müceddeden binâ olunan köşkün ve dahi ol köşke muttasıl odanın penceresinin ve nerdübân başında olan pencerenin ve fevkānî odaya su‘ûd edecek nerdübânın mezbûr Hasan Ağa’nın menzili dâhilinde makarr-ı nisâ olan mevâzi‘a havâlesi olduğu mu‘âyene olundukda zikrolunan köşkün mezbûr Hasan Ağa’nın mülkü tarafında olan iki cânibine tuğla duvar yapmağla [68b] ve yâhud ol köşkü yağmur ile ve köşke muttasıl oda penceresini seddetmekle ve nerdübân başında olan pencereyi iki kat sağır cam etmekle ve dahi Hasan Ağa’nın mülkü tarafında tahta perdeleri söküp yerine altı a[r]şun gemi tahtası mündefi‘ olur deyü bî-garaz ehl-i vukūf kimesneler ihbâr eylediklerinde ber-minvâl-i muharrer havâleyi def‘ etmek üzere vekîl-i mezbûr Mustafa Beşe’ye tenbîh ve dahi Sıvacı Yorgi ve Na‘lçeci Kiryako ve Çelo Kürkçü ve Yamandi Hayyât ve Nikola Balıkcı ve Uzun Kemhâcı ve Kostantin Hayyât nâm zimmîlerin yedlerinde olan menâzillerin dahi mezbûr Hasan Ağa’nın menziline olan havâlelerinde def‘ ve ref‘ etmeleri üzere tenbîh olundukdan sonra mahalle-i mezbûreye muttasıl Kara Hasan Mescid-i şerîfi karşısında Alçıcı Ahî Oğlu demekle ma‘rûf zimmî haftada iki kerre Karamanlı zimmîleri menziline cem‘ edip gece ve gündüz nakkāre ve zurna ile şurb-i hamr ve arak edip sît [u] sadâlarından mescid-i mezbûrda edâ-i salât edemeziz, her birimiz ahvâlinden müte’ezzîleriz deyü mescid-i mezbûr İmâmı Hasan Efendi b. Mehmed el-imâm ve Ahmed Çelebi b. Ömer el-müezzin ve el-Hâc Halil Ağa b. Şaban ve Şaban Beşe b. Abdullah ve Ahmed Beşe b. Şaban ve Mehmed Çelebi b. Ömer nâm kimesneler zimmî-i mezbûr Ahî Oğlu’nun sû-i hâlini ihbâr ve dahi mezbûr Hasan Ağa’nın câr-ı mülâsıkası Kādı Zevcesi demekle ma‘rûfe hatunun menzilinde müste’cir olan Gemici oğlu İbrahim kendi hâlinde olmayıp bundan akdem Arhiman nâm zimmînin mahalle-i mezkûrede vâki‘ dükkânına girip hufyeten bir sepet eğserisin almışdır deyü mezbûr İbrahim’in sû-i hâlini Ahmed Ağa b. Abdullah nâm kimesne ve sâirleri ihbâr ve dahi mahalle-i mezbûre Hâcce Kadın ahâlîsinden Boyacı Manol nâm zimmî dâimâ menzili içinde çeng ve çagana ile şurb-i hamr ve arak ve i‘lân-ı fısk ve fücûr eder deyü ahâlî-i mahalle-i mezbûre ihbâr ve dahi hâlâ Marat nâm zimmî verese yedlerinde olan menzil fi’l-asl Kapıcı Mustafa Bey’in ve Trabzonlu Yusuf Beşe’nin mülkü ve Katoz nâm zimmî yedinde olan işbu menzil Sepetçi oğlu Mehmed Beşe’nin mülkü ve Kasab Orna yedinde olan işbu menzil Osman Beşe nâm râcilin mülkü ve Baklacı zimmî yedinde olan menzil Yedekçi Kurd Bey’in mülkü ve Astarcı Aleksan ve Gedik ve Papas oğlu ve Kara Dülger nâm zimmîler yedlerinde olan işbu menâzil Tahir Efendi nâm şeyhin mülkü ve Papuççu Aslan zimmî yedinde ve Kürkçü Papas yedinde olan menziller bir seyyidin mülkü ve Balıkçı zimmî yedinde olan menzil Eyüb Çavuş mülkü ve Zülfikar nâm kimesne menzilini odalar edip zimmî tâifesine îcâr ve dahi mezbûr Eyüb Çavuş Selâmlığı Ferruh nâm kimesne ol dahi Makarus nâm zimmîye bey ‘ eylemişdir deyü ahâlî-i mahalle-i mezbûre ve sâir mahallât ahâlîsi ihbâr eylediklerinde Mevlânâ-yı mezbûr vâki‘ hâli mahâllinde tahrîr ba‘dehû gelip alâ-vukū‘ihî meclis-i şer‘de inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mustafa Efendi b. İbrahim el-imâm, Mehmed Halîfe b. Ali el-müezzin, Mahmud Ağa b. Ahmed, Mehmed Ağa b. Hüseyin el-cündî, Derviş Beşe b. Mehmed Abdurrahman Çelebi b. el-Hâc Mehmed, Ali b. el-Hâc Mehmed, Şaban Beşe b. Abdullah, İsmail b. Musa, Mehmed Beşe b. Abdullah ser-oda, Mehmed Çelebi b. el-Hâc Ömer, Ahmed Beşe b. Şaban, Mehmed Beşe b. Abdullah, Abdülkerim Çelebi b. Ali, Osman b. Süleyman, İbrahim b. Ahmed, İbrahim Efendi b. Ramazan, Mehmed Efendi b. Osman el-imâm, Mehmed b. Ahmed el-câbî, Ahmed Ağa b. Abdullah, Ebûbekir Ağa b. Abdullah, Musa b. Hüseyin, Ahmed Bey b. Abdullah ve gayruhum.