İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 491 Hüküm no: 558 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salime bt. Ömer Efendi’nin evini Kilârî Mehmed Ağa Vakfı’na sattığı ve daha sonra da kiraladığı Hüccet-i istiğlâl. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi Kostantıniyyeti’l-mahmiye’de el-Hâc İlyas mahallesinde Sâlime bt. Ömer Efendi nâm hatunun sâkine olduğu menzi[l-i] câ’i’z-zikre varıp zeyl-i rakīmde isimleri mastûr olan Müslimîn ile akd-i meclis-i şer‘ eyledikde mezbûre Sâlime Hatun zâtı Hasan Dede b. Ramazan ve Mehmed Dede b. Şaban ta‘rîfleri ile mu‘arrefe oldukdan sonra meclis-i ma‘kūd-ı mezbûrda işbu kitâbın sahibi hâlâ Kilârî Mehmed Ağa Vakfı’na mütevellî olan mefharu’l-a‘yân Hasan Ağa b. Mehmed mahzarında ikrâr ve i‘tirâf edip mahalle-i mezbûrede vâki‘ bir tarafı İbrahim Efendi mülküne ve bir tarafı babam mezbûr Ömer Efendi Vakfı’na ve iki tarafı tarîk-i âmma müntehî mülk menzilimi bi-tarîkı’l-istiğlâl merkūm Hasan Ağa’ya beş yüz kıt‘a riyâlî kebîr guruşa bey‘ ve teslîm ol dahi mal-ı vakf-ı mezbûr ile iştirâ ve kabûl ve kabz ve tesellüm eyledikden sonra semeni olan meblağ-ı mezbûru yedinden ahz u kabz edip menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan bir sene tamamına değin mütevellî-i mezbûrdan yetmiş beş kıt‘a riyâlî kebîr guruşa istîcâr ve kabûl edip ol dahi ber-vech-i muharrer îcâr ve tesl[î]m eyledi dedikde gıbbe’t-tasdîk vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Bayram ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Receb Efendi b. Ebûbekir el-imâm, Abdurrahman Çelebi b. Receb, Seyyid Mehmed Çelebi b. Mustafa, Halil Çavuş b. Ahmed, Süleyman Çelebi b. Ahmed.