İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 496 Hüküm no: 562 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Beşe b. Habib ile Muslu Bey b. Nasuh’un varisleri arasındaki anlaşmazlığın Osman Çelebi b. İbrahim’in kefaletiyle sulh yoluyla halledildiği İbrâ ve kefâlet. Vilâyet-i Anadolu’da Karahisâr-ı Şarkī sancağında Bâzârsuyu kazâsına tâbi‘ Çukur nâm karye sükkânından olup Mahmiye-i İstanbul’da Sofular mahallesinde Süleyman Beşe b. Habib nâm kimesne menzilinde sâkin iken bundan akdem vefât eden Muslu Bey b. Nasuh nâm kimesnenin verâseti li-ebeveyn karındaşları İbrahim ve Fethullah ve Mustafa nâm kimesnelere münhasıra olup asl-ı meseleleri üç sehimden olup sihâm-ı mezbûreden bir sehmi mezbûr İbrahim’e ve bir sehmi merkūm Fethullah’a ve bir sehmi mezbûr Mustafa’ya münhasıra olduğu şer‘an zâhir ve müte‘ayyin oldukdan sonra mersûm Mustafa kendi tarafından asâleten ve li-ebeveyn karındaşları mersûmân Fethu[llah] ve İbrahim taraflarından husûs-ı âti’l-beyâna vekîlleri olmağla vekâleten meclis-i şer‘de işbu bâ‘isü’l-kitâb fahrü’l-akrân Süleyman Beşe b. Habib mahzarında asâleten ve vekâleten ikrâr ve takrîr-i kelâm edip karındaşım mezbûr Muslu Bey merkūm Süleyman Beşe’nin menzilinde vefât eyledikde yanında mevcûd olan beş bin hurda akçe ile yedi aded şerîfî altununu ahz u kabz eylemiş idi deyü mersûm Süleyman Beşe’den da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi. El-hâletü-hâzihî tavassut-ı muslihîn ile da‘vâ-yı mezbûreden merkūm Süleyman Beşe benimle iki bin altı yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr iki bin altı yüz akçeyi merkūm Süleyman Beşe yedinden asâleten ve vekâleten ahz u kabz eyledim, ba‘de’l-yevm husûs-ı mezbûra müte‘allika da‘vâdan mezbûr Süleyman Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î yine karye-i mezbûre sükkânından Osman Çelebi b. İbrahim nâm kimesne meclis-i mezbûrda mezbûr Süleyman Beşe mahzarında ikrâr ve takrîr-i kelâm edip eğer merkūmân Fethullah ve İbrahim merkūm Mustafa’yı vekîl etdiklerin inkâr edip meblağ-ı mezbûrdan hisseleri olan sekiz yüz altmış altışar akçeyi mezbûr Süleyman Beşe’den taleb ederler ise ben zâmin ve kefîlim dedikde mâ hüve’l-vâki‘ bi’t-taleb ketb olundu. Fi’s-sâdis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hasan Bey b. Ömer Teberdâr, Murtaza Bey b. Ârif Ahmed, Süleyman Ağa b. Abdullah, Osman Çelebi b. Abdullah, Rasûl b. Rıdvan.